.....................

تقریباً تین ماہ بعد امریکی صدارتی انتخابات منعقد ہونے والے ہیں، لیکن متعدد تجزیہ کاروں نے کہا ہے کہ 80 فی صد سے زائد امکان ہے کہ سابق امریکی وزیر خارجہ اور ڈیموکریٹک امیدوار ہیلری کلنٹن ری پبلیکن پارٹی کے ڈونالڈ ٹرمپ کو شکست دیں گی، جو جائیداد کے نامور کاروباری شخص ہیں اور پہلی بار کسی منتخب عہدے کے لیے میدان میں ہیں۔

آٹھ نومبر کو ہونے والے انتخاب کے لیے 12 ہفتے کی انتخابی مہم باقی ہے، جب جیتنے والا صدر براک اوباما کی جگہ لے گا جو آئندہ جنوری میں اپنی میعاد مکمل کرنے والے ہیں؛ جب کہ ستمبر اور اکتوبر میں کلنٹن اور ٹرمپ کے مابین تین مباحثے ہونے والے ہیں جن سے کسی بھی امیدوار کی قسمت بدل سکتی ہے۔

تاہم، تجزیہ کاروں کی رائے میں اس دوڑ میں، فی الوقت، کلنٹن کو کافی سبقت حاصل ہے، اور رائے عامہ کے قومی جائزوں کے مطابق، اُنھیں سات فی صد کی برتری برقرار ہے، جب کہ کانٹے کے مقابلے والی ریاستیں جن کے بل بوتے پر امریکی صدارتی انتخابات کا فیصلہ ہوگا وہاں بھی اُنھیں سبقت دکھائی دیتی ہے۔

چار سالہ امریکی صدارتی انتخاب کا دارومدار قومی مقبولیت پر مبنی رائے دہی نہیں ہے، بلکہ 50 ریاستوں میں ووٹنگ کے نتائج پر ہوتا ہے؛ جب کہ اِن ریاستوں کی اہمیت ’الیکٹورل کالج‘ میں اُن کی پوزیشن پر منحصر ہے، جو آبادی کی بنیاد پر اور کانگریس میں سینیٹروں اور نمائندگان کے عدد کے اعتبار سے طے ہوتا ہے۔ 

چالیس ریاستوں میں ووٹروں نے پچھلے انتخابات میں ڈیموکریٹس اور ری پبلیکنز کا ساتھ دیا ہے، جب کہ دیگر 10 ریاستوں میں جہاں سیاسی اتحاد جوڑ توڑ سے کام نہیں لیتے، وہاں ہمدردیاں ایک سے دوسری پارٹی کی جانب بدلتی رہتی ہیں، جن کا انحصار امیدوار کی شخصیت یا پھر درپیش سیاسی مسائل پر ہوتا ہے۔

تجزیہ کاروں کے مطابق، اِنہی سخت مقابلے والی ریاستوں میں کلنٹن کو پہلے ہی 538 پر مشتمل ’الیکٹورل کالج‘ کی 270 کی اکثریت کی حمایت حاصل ہے، جن کی مدد سے وہ ملک کی پینتالیسویں صدر اور پہلی خاتون کمانڈر اِن چیف بن سکتی ہیں۔

’نیویارک ٹائمز‘ کی ’’538‘‘ ویب سائٹ کی الیکشن پیش گوئی، اور ’پرنسٹن الیکشن کنسورشئم‘ اور ’پرڈکٹ وائز‘ نے کہا ہے کہ کلنٹن کی جیت کا 80 فی صد امکان ہے؛ جب کہ سیاسی تجزیہ کار چارلی کوک، لیری سباتو اور اسٹوئرٹ روتھن برگ اور نتھن گونزالیز سبھی یہی کہہ رہے ہیں کہ الیکشن کا پلڑا اُنہی کی طرف بھاری ہے۔

سیاسی جائزوں کے مطابق، ٹرمپ جس نے نامور ری پبلیکن عہدے داروں کو پیچھے چھوڑتے ہوئے پارٹی کی صدارتی نامزدگی حاصل کی، اور کلنٹن جو سابق صدر بِل کلنٹن کی بیوی ہیں کو گذشتہ ماہ ری پبلیکن اور ڈیموکریٹک پارٹی کے قومی کنوینشن کے بعد نئی حمایت حاصل ہوئی ہے۔ ری پبلیکن کنویشن کے بعد، ٹرمپ کی کلنٹن کے ساتھ برابر کی مقبولیت کی باتیں سامنے آئیں، لیکن ڈیموکریٹک کنوینشن کے بعد کلنٹن کو فوری طور پر سبقت حاصل ہوگئی؛ اور رائے عامہ کے جائزوں کے مطابق اس وقت اُنھیں متفقہ طور پر برتری حاصل ہے۔

طویل مدت سے میدان کے سیاسی گرو رہنے والے، کوک نے بتایا ہے کہ دونوں سیاسی کنوینشنز کے بعد قومی دوڑ ابھی ختم نہیں ہوئی، لیکن ’’یہ بھرپور طور پر جاری ہے‘‘۔

اُنھوں نے مزید کہا کہ ’’متعدد مبصرین نے توجہ دلائی ہے کہ جدید صدارتی پولنگ کے گذشتہ چھ عشروں کو مدِ نظر رکھتے ہوئے دیکھا یہ گیا ہے کہ جس امیدوار کو آخری کنویشن کے دوسرے ہفتے کے بعد کیے گئے رائے عامہ کے جائزوں میں برتری ہوتی ہے، وہی فتحیاب ہوتا ہے۔ ہم یہ دیکھتے ہیں کہ اِس بات کا قوی امکان ہے کہ ہیلری کلنٹن ڈونالڈ ٹرمپ پر حاوی ہیں، چونکہ اُنھیں خاصی سبقت حاصل ہے جو بڑھ رہی ہے‘‘۔

رائے عامہ کے جائزوں سے پتا چلتا ہے کہ امریکی دونوں امیدواروں کو منفی نگاہ سے دیکھتے ہیں، لیکن کلنٹن کے مقابلے میں وہ ٹرمپ کو زیادہ منفی خیال کرتے ہیں۔ سرویز میں دکھائی دیتا ہے کہ اب فیصلہ اِس بات پر ہے کہ وہ کس امیدوار کو زیادہ برا خیال کرتے ہیں اُنھیں ووٹ نہ دیا جائے بجائے ٹرمپ اور کلنٹن نام پر ووٹ دینے کے۔

ڈیموکریٹ نائب صدارتی امیدوار ٹم کین نے ڈونلڈ ٹرمپ کو ٹیکس ریٹرن جاری نہ کرنے پر آڑے ہاتھوں لے لیتے ہوئے تنقید کا نشانہ بنایا ہے ۔ اپنی متعصب اور غیر ذمہ دارانا سیاست کے باعث 4 اہم امریکی ریاستیں ٹرمپ کے ہاتھوں سے نکل رہی ہیں۔

امریکی ریاست نیو ہیمپشائر کے شہر مانچسٹر میں ٹم کین کا نے اپنے حامیوں سے خطاب میں کہنا تھا کہ ڈونلڈ ٹرمپ کا سیاست سے کوئی تعلق نہیں رہا اور نہ ہی ٹرمپ نے کبھی کسی کی پرواہ نہیں کی، جبکہ ہلیری کلنٹن کا ایک سیاسی پس منظر ہے اور وہ امریکی عوام سے محبت کرتی ہیں۔

ہلیری کلنٹن نے گزشتہ 40سال کے ٹیکس ریٹرن جاری کرے امریکی صدر کے انتخاب کو نہایت آسان کردیا ہے، جبکہ ٹرمپ مختلف حیلے بہانے بنا کر ٹیکس ریٹرن جاری کرنے سے بھاگ رہے ہیں۔ 

دوسری جانب درجنوں ریپبلکنز نے ریپبلکن نیشنل کمیٹی پر زور دیا ہے کہ وہ ڈونلڈ ٹرمپ کی انتخابی مہم کے فنڈز روک دے، آر این سی کے پولز کے مطابق ہلیری کلنٹن کو ٹرمپ پر6 اشاریہ8 پوائنٹس کی برتری حاصل ہے۔ 

ٹرمپ اپنی منفی سیاست کی وجہ سے عوامی اور سیاسی سطح پر تنقید کا نشانہ بنے ہوئے ہیں، سی آئی اے کے سابق سربراہ نے ان کو قومی سلامتی کے لیے خطرہ قرار دیا ہے، جبکہ امریکی قومی سلامتی کے 50ماہرین نے بھی ٹرمپ کو امریکی صدر کے منصب کے لیے نااہل کہا ہے۔

ایک معروف دستاویزی فلم ساز مائیکل مور نے ڈونلڈ ٹرمپ کی بیٹی ایوانا ٹرمپ کو لکھے گئے خط میں مشورہ دیا ہے کہ ان کے والد کی طعبیت دن بہ دن بگڑتی جارہی ہے، ٹرمپ کو مدد کی ضرورت ہے۔ 

غیر ملکی خبر ایجنسی کے پولز کے مطابق 4 اہم امریکی ریاستوں فلوریڈا، نارتھ کیلورینا، ورجیانا اور کولوراڈو میں بھی ریپبلکن صدارتی امیدوار کی مقبولیت میں مسلسل کمی آرہی ہے

بقول پیٹر منصور، ’’ٹرمپ اس عہدے کے لیے بالکل ہی غیر موزوں ہیں۔ اُن کا انداز، اُن کی انا پرستی، الفاظ پر کنٹرول نہ ہونے کی عادت، یہ تمام باتیں ایسی ہیں جن کے باعث کسی بھی صدر کو شدید مشکلات کا سامنا ہو سکتا ہے‘‘

واشنگٹن — 

پیٹر منصور ری پبلیکن پارٹی کے خودساختہ عمر بھر کے حامی اور امور خارجہ پالیسی پر گہری نظر رکھتے ہیں۔

وہ امریکی فوج کے ریٹائرڈ کرنل ہیں جو ووٹنگ کے اپنے قدامت پسندانہ سوچ میں پختہ ہیں۔ منصور کے بقول، ’’ریگن سے رومنی تک میں نے ہر ری پبلیکن صدارتی امیدوار کو ووٹ دیا ہے‘‘۔ عراق جنگ کے دوران وہ سابق جنرل ڈیوڈ پیٹریس کے قریبی ساتھی رہے ہیں۔

تاہم، اس سال، ڈونالڈ ٹرمپ کو پارٹی کی طرف سے نامزدگی دیے جانے پر، اُن کی سوچ ڈاواں ڈول سی لگتی ہے۔ منصور نے ’وائس آف امریکہ‘ کو بتایا کہ ’’ٹرمپ اس عہدے کے لیے بالکل ہی غیر موزوں ہیں۔ اُن کا انداز، اُن کی انا پرستی، الفاظ پر کنٹرول نہ کرنے کی عادت، یہ تمام باتیں ایسی ہیں جن کے باعث کسی بھی صدر کو شدید مشکلات کا سامنا ہو سکتا ہے‘‘۔

منصور اُن ری پبلیکنز میں سے ہیں جن کی تعداد بڑھ رہی ہے، خاص طور پر قومی سلامتی کی اسٹیبلشمنٹ میں، جو ٹرمپ کی مخالفت کرتے ہیں۔ منصور کی طرح کے کئی لوگ، نہ صرف یہ کہ وہ ری پبلیکن پارٹی کے نامزد امیدوار کی مذمت کرتے ہیں بلکہ وہ اُن کی ڈیموکریٹک حریف ہیلری کلنٹن کی حمایت کا غیر معمولی قدم تک اٹھا رہے ہیں۔

وہ کہتے ہیں کہ ’’کئی پالیسیوں پر میں ہیلری کلنٹن سے اتفاق نہیں کرتا۔ لیکن، بحیثیتِ انسان اُن میں صدر بننے کی اہلیت ہے۔ وہ چست ہیں۔ وہ نپی تُلی بات کرتی ہیں۔ وہ اپنے مشیروں کی نصیحت کو قبول کرتی ہیں۔ وہ تجربہ کار ہیں‘‘۔

منصور اور دیگر خارجہ پالیسی کے شاہینوں کے بیانات سے پتا چلتا ہے کہ دنیا کے بارے میں وہ کلنٹن کی سوچ کے حامی ہیں، جنھوں نے امریکی سینیٹر اور وزیر خارجہ کے طور پر عراق، لیبیا سے یوکرین تک مداخلتی پالیسیوں کی حمایت اور نگہبانی کی ہے۔

امور خارجہ کے شعبے میں ٹرمپ کے مقابلے میں کلنٹن کے خیالات مختلف ہیں، حالانکہ ایسا بھی ہے کہ کبھی کبھار اُن کا ریکارڈ انتہائی متضاد رہا ہے (واضح ٹیلیفون گفتگو سےلے کر مشرق وسطیٰ کے ملکوں کو فتح کرنا اُن پر قبضہ جمانا، ’’تیل حاصل کرنے‘‘ کے بدلے امریکہ کی جانب سے دنیا میں وسیع تر فوجی برداشت کی تجاویز کا لحاظ کرنا شامل ہے)۔

ابھی یہ واضح نہیں آیا امریکی خارجہ پالیسی اسٹیبلشمنٹ ٹرمپ کو ووٹ دے گی یا کلنٹن کو۔

تاہم، اگر ’’شاہین‘‘ بڑی تعداد میں کلنٹن کی حمایت کرتے ہیں تو ایک گروپ کی جانب سے ہمدردیاں تبدیل کرنے کا یہ ایک اہم معاملہ ہوگا جو عشروں تک ری پبلیکن پارٹی کے ساتھ رہے ہیں۔

اس ہفتے، خارجہ پالیسی کے نمایاں لوگ جو کلنٹن کے حامی بنے ہیں اُن کی تعداد بڑھتی جا رہی ہے۔ اُن میں اب متعدد مشہور شخصیات شامل ہوگئی ہیں جن میں سابق معاون وزیر خارجہ رچرڈ ارمیٹیج ؛ نیشنل انٹیلی جنگ کے سابق سربراہ جان نیگروپونٹے؛ اور ’سی آئی اے‘ کے سابق سربراہ، مائیکل موریل شامل ہیں، جنھوں نے حالیہ دِنوں ’نیویارک ٹائمز‘ میں شائع اپنی تحریر میں کہا ہے کہ ٹرمپ ’’ہماری قومی سلامتی کی پالیسی کے لیے خطرے کا باعث بن سکتے ہیں‘‘۔

بشکریہ وائس آف امریکہ

ریپبلکن جماعت کے اہم رہنماؤں کے ایک اور گروپ نے کہا ہے کہ وہ صدارتی امیدوار ڈونلڈ ٹرمپ کی حمایت نہیں کریں گے۔ یہ رواں ہفتے دوسرا موقع ہے جب کہ اس سے قبل اس جماعت کے سکیورٹی و سلامتی اور تجارتی ماہرین بھی ٹرمپ سے متعلق ایسی ہی رائے کا اظہار کر چکے ہیں۔

جماعت کے 70 سے زائد ارکان جن میں سابق کانگریس اراکین، ریگن اور دونوں بش صدور کی انتظامیہ میں شامل رہنے والے سینیئر ارکان بھی شام ہیں، نے ریپبلکن نیشنل کمیٹی "آر این سی" کے چیئرمین کے نام خط لکھا ہے۔

یہ ممبران چاہتے ہیں کہ ’آر این سی‘ ٹرمپ کی حمایت کے لیے ریپبلکن کا پیسہ، وقت، کارکنان اور تشہیر بند کرے اور اس کی بجائے یہ وسائل ایوان نمائندگان اور سینیٹ کے امیدواروں پر صرف کرے۔

ان کا کہنا تھا کہ نومبر میں ٹرمپ کے جیتنے کے امکانات دن بہ دن ختم ہوتے جا رہے ہیں۔

بعض دیگر وجوہات کے علاوہ معترض اراکین کے پیش نظر ٹرمپ اور عراق میں جان دینے والے مسلمان امریکی فوجی کے والدین کے درمیان ہونے والی بیان بازی اور "مختلف چھوٹے بڑے امور پر ٹرمپ کی طرف سے دروغ گوئی"بھی شامل ہے۔

ریپبلکن کمیونیکیشنز کے عہدیدار اینڈریو وائن سٹئین نے وائس آف امریکہ کو بتایا کہ "اگر آر این سی فوری طور پر اپنی توجہ منتقل نہیں کرتی تو نومبر میں ٹرمپ کا معاملہ کانگریس میں ہماری اکثریت کو بھی تباہ کر سکتا ہے۔ ہم اور زیادہ انتظار کے متحمل نہیں ہو سکتے کہ ہم اپنے وسائل وہاں صرف کریں جہاں ہم جیت سکتے ہیں بجائے اس کے اور زیادہ پیسہ کامیاب نہ ہو سکنے والے صدارتی امیدوار پر لگائیں۔"

تاحال اس بارے میں ٹرمپ کی طرف سے کوئی ردعمل سامنے نہیں آیا ہے۔

پیر کو ریپبلکن جماعت کے 50 رہنماوں نے بھی ایک خط میں کہا تھا کہ وہ ٹرمپ کی حمایت نہیں کریں گے کیونکہ ان کے نزدیک ٹرمپ صدارت کے اہل نہیں ہیں۔

رواں ہفتے امریکی رائے دہندگان کے ہونے والے جائزے ظاہر کرتے ہیں کہ ریپبلکن صدارتی امیدوار ڈونلڈ ٹرمپ اپنی حریف ڈیموکریٹک ہلری کلنٹن سے ایک واضح فرق کے ساتھ پیچھے ہیں۔

میکلاچی میرسٹ پول کے تازہ ترین جائزے کے مطابق ہلری کلنٹن 48 فیصد اور ٹرمپ 33 فیصد پسندیدگی کی شرح پر ہیں۔ گزشتہ ماہ میں کیے گئے سروے میں یہ فرق 42 اور 39 فیصد تھا۔

میرسٹ کالج پولنگ گروپ کے ڈائریکٹر لی میرینگوف کہتے ہیں کہ ووٹرز کی تیزی سے تبدیل ہوتی ہوئی پسندیدگی ظاہر کرتی ہے کہ "ٹرمپ کی صدارتی امیدواری خطرے میں ہے۔"

یہ جائزہ رواں ہفتے پیر سے بدھ کے درمیان کیا گیا اور میرینگوف کے مطابق ٹرمپ کی طرف سے "غلطیوں کی ایک طویل فہرست بشمول ڈیموکریٹ قومی کنونشن میں شریک مسلمان جوڑے پر تنقید" نے کلنٹن کا پلڑہ بھاری کرنے میں کردار ادا کیا۔

لیکن سروے میں کئی اور اشاریے ایسے بھی ہیں جو سابق وزیرخارجہ ہلری کلنٹن کے لیے مثبت نہیں۔ میرسٹ پول کے مطابق 40 فیصد رجسٹرڈ ووٹر کہتے ہیں کہ وہ ہلری کلنٹن کی حمایت صرف اس لیے کر رہے ہیں کیونکہ وہ ٹرمپ کے مخالف ہیں۔

55 فیصد رجسٹرڈ ووٹرز کا کہنا تھا کہ وہ ہلری کلنٹن کے بارے میں موافق رائے نہیں رکھتے۔ تاہم ناموافق رائے کی شرح ٹرمپ کے لیے 66 فیصد ہے۔

میکلاچی اور جینفورورڈ کی طرف سے کیے گئے جائزوں کے مطابق 18 سے 30 سال کے 25 فیصد ووٹرز ٹرمپ کے بارے میں موافق رائے رکھتے ہیں۔

میکلاچی کے سروے میں یہ بھی بتایا گیا کہ 23 فیصد ووٹرز ایک تیسری جماعت لبرٹیرین کے صدارتی امیدوار گیری جانسن کو ووٹ دیں گے جب کہ جینفورورڈ کے مطابق دس میں سے سات ووٹرز یہ محسوس کرتے ہیں کہ وہ جانسن کے بارے اتنا نہیں جانتے کہ انھیں ووٹ دیں۔

گرین پارٹی کی امیدوار جل اسٹئین کے ساتھ بھی کچھ ایسا ہی معاملہ ہے اور میکلاچی کے جائزے کے مطابق 16 فیصد کا کہنا تھا کہ وہ انھیں ووٹ دیں گے۔

...................

ری پبلیکن پارٹی کے رہنما حالیہ دِنوں ہونے والی قومی اور فیصلہ کُن ریاستوں میں ووٹنگ پر تشویش کا اظہار کر رہے ہیں جس میں ڈیموکریٹک پارٹی کی صدارتی امیدوار ہیلری کلنٹن نے ری پبلیکن پارٹی کے امیدوار ڈونالڈ ٹرمپ پر سبقت حاصل کی ہے۔

نیو ہیمپشائر، مشی گن اور پنسلوانیا کی فیصلہ کُن ریاستوں میں ہونے والے رائے عامہ کے جائزوں میں کلنٹن کو ٹرمپ پر واضح سبقت حاصل ہوگئی ہے۔ اس سے قبل ’سی این این‘ اور ’این بی سی نیوز‘ نے سروے کرائے تھے جن میں کہا گیا تھا کہ ٹرمپ کم از کم آٹھ پوائنٹ سے پیچھے ہیں۔

رائے عامہ کے یہ جائزے گذشتہ ہفتے منعقد ہونے والے ڈیموکریٹک نیشنل کنوینشن کے بعد سامنے آئے ہیں، جہاں ایسا لگتا ہے کہ کلنٹن کو پانچ سے چھ پوائنٹ کا فائدہ ہوا ہے، جو پارٹی کے کسی کنویشن کے بعد عام سی بات ہے۔

لیکن، یہ اِس بات کی بھی غماز ہے کہ ٹرمپ تواتر سے متنازع معاملات سے دوچار رہے ہیں، جن کے باعث نہ صرف ڈیموکریٹس کی جانب سے منفی ردِ عمل سامنے آیا ہے بلکہ اس میں چند معروف ری پبلیکن رہنما بھی شامل ہیں۔

’’ہم بہتر کارکردگی دکھا رہے ہیں‘‘: ٹرمپ

اپنی انتخابی مہم کو جاری رکھتے ہوئے، ٹرمپ نے ڈھٹائی کا مظاہرہ کیا ہے، حالانکہ ری پبلیکن پارٹی کے رہمناؤں نے برہمی کا اظہار کیا ہے۔

جیکسن ویل میں ایک ریلی سے خطاب کرتے ہوئے، اُنھوں نے کہا ہے کہ اُن کی انتخابی مہم بہتر طور پر چل رہی ہے اور نومبر میں کامیابی کے حصول کی جانب جا رہی ہے۔ ٹرمپ نے تالیوں کی گونج میں کہا کہ ’’اس لیے، میں آپ سے کہنا چاہتا ہوں کہ انتخابی مہم بہتر چل رہی ہے۔ یہ کبھی اتنی متحد نہیں تھی‘‘۔

ہلری کلنٹن نے ڈیموکریٹک پارٹی کی طرف سے صدارتی امیدوار کی نامزدگی قبول کرتے ہوئے امریکی قوم کو درپیش چیلنجز سے نمٹنے کے لیے متحد ہونے کی ضرورت پر زور دیا ہے۔

جمعرات کو دیر گئے پینسلوینیا کے شہر فلاڈیلفیا میں اپنی جماعت کے قومی کنونشن کے اختتام پر اپنے خطاب میں ہلری کلنٹن کا کہنا تھا کہ "یہ ہم پر منحصر ہے۔ ہمیں یہ فیصلہ کرنا ہوگا کہ ہم مل کر کام کریں گے تاکہ ہم دوبارہ اکٹھے آگے بڑھ سکیں۔"

68 سالہ ہلری کلنٹن کسی بھی بڑی جماعت کی طرف سے منصب صدارت کے لیے نامزدگی حاصل کرنے والی پہلی امریکی خاتون ہیں۔

انھوں نے اپنے ورمونٹ سے سینیٹر برنی سینڈرز کو پرائمری اور کاکس کے ہونے والے انتخاب میں شکست دے کر یہ نامزدگی حاصل کی۔

سینڈرز بھی اس کنونشن میں اپنی تقریر کے دوران ان کی حمایت کر چکے ہیں لیکن ان کے بعض حامی گروپوں نے ہلری کلنٹن کی حمایت نہ کرنے کا اعلان بھی کیا ہے جو کہ خاتون امیدوار کے لیے نومبر میں ہونے والے انتخاب میں ایک چیلنج ہو سکتا ہے۔

ہلری کلنٹن نے جمعرات کو اپنی تقریر میں سینڈر کی طرف سے ان کی حمایت کو سراہتے ہوئے نوجوانوں کو ووٹ ڈالنے، اقتصادی ترقی اور سماجی انصاف پر آواز بلند کرنے کو اجاگر کیا۔ انھوں نے کہا کہ "میں آپ کو بتایا چاہتی ہوں کہ میں نے آپ کو سنا ہے، آپ کا مقصد ہمارا مقصد ہے۔"

نومبر میں ہونے والے صدارتی انتخاب میں ان کا مقابلہ ریپبلکن امیدوار ڈونلڈ ٹرمپ سے ہوگا۔

ہیلری کلنٹن، جنھوں نے امریکی سیاست کی ایک پوری نسل پر واضح اثرات ڈالے ہیں، ڈیموکریٹک پارٹی کی جانب سے صدارتی نامزدگی قبول کریں گی، جس کے بعد وہ امریکیوں کو بتائیں گی کہ جنوری میں جب صدر براک اوباما اپنا عہدہٴ صدارت مکمل کریں گے، تو نئی امریکی سربراہ کے طور پر اُن پر اعتماد کا اظہار کیوں ضروری ہے۔

کلنٹن کسی اہم سیاسی پارٹی کی جانب سے نامزد ہونے والی پہلی خاتون ہیں، ’گیلپ‘ کے مطابق، اُنھیں میں زیادہ تر عزت کی نگاہ سے دیکھا جاتا ہے۔

تاہم، ساتھ ہی، امریکی ووٹروں کی اکثریت نے رائے عامہ کا جائزہ لینے والے اہل کاروں کو بتایا ہے کہ وہ اُن پر اعتماد نہیں کرتے، جن متضاد باتوں کے باعث ری پبلیکن پارٹی کے صدارتی امیدوار ڈونالڈ ٹرمپ کے ساتھ اُن کا مقابلہ سخت ہوگیا ہے، جو وائٹ ہاؤس کے چار سالہ عہدے کے لیے مدِ مقابل ہیں۔

اڑسٹھ برس کی ہیلری کلنٹن سنہ 2009 سے 2013ء تک امریکی وزیر خارجہ رہ چکی ہیں۔ وہ بدھ کے روز کچھ دیر تک پینسلوانیا کے شہر فلاڈیلفیا میں منعقدہ ’ڈیموکریٹک نیشنل کنویشن‘ میں نطر آئیں، جس سے قبل صدر اوباما نے جانشین کے طور پر اُن کی حمایت کا اعلان کیا۔ اُنھوں نے کہا کہ اب تک صدارت سنبھالنے والے اُن کے مقابلے میں اتنے اہل نہیں تھے، جن میں وہ خود اور اُن کے شوہر، سابق صدر بِل کلنٹن شامل ہیں۔

جمعرات کے روز، کلنٹن اپنا کیس پیش کریں گی۔ اُن کے خطاب سے قبل، انتخابی مہم کی منیجر روبی موک نے کہا ہے کہ کلنٹن آٹھ نومبر کو ووٹ ڈالنے کے لیے ’’ووٹروں کے پاس ایک بہت ہی واضح انتخاب‘‘ موجود ہے۔

موک نے ’سی بی ایس دِس مارننگ‘ شو میں تسلیم کیا کہ ٹرمپ، جو جائیداد کے نامور کاروباری شخص ہیں، پہلی بار کسی منتخب عہدے کے لیے انتخاب لڑ رہے ہیں۔ وہ ’’بہت بڑے دعوے کر رہے ہیں جو کچھ لوگوں کے لیے انتہائی پُر کشش ہیں‘‘۔

موک کے بقول، ’’انتخابی مہم کے سلسلے میں جو بات ہمیں کرنی ہے اُس کا دارومدار ہیلری کی آج کی تقریر سے ہے؛ اور اس کنویشن میں اب تک اس بات کو یقینی بنایا گیا ہے کہ لوگوں کو حقائق سے آگاہ کیا جائے‘‘۔

اُنھوں نے ٹرمپ کو ’’ایسا شخص قرار دیا جنھوں نے پوری زندگی پیسہ بنانے کی فکر کی ہے، اور وہ محنت کشوں کا حق مار کر امیر بنے ہیں، جو بات لوگوں کو سمجھنی ہوگی‘‘۔

کلنٹن نے متعدد بار کہا ہے کہ اُنھیں ووٹروں کا اعتماد جیتنے کی ضرورت ہوگی، جنھیں اُن کی جانب سے نجی اِی میل سرور کے استعمال سے کسی حد تک دھچکہ پہنچا ہے، جب وہ اوباما کے پہلے عہدہٴ صدارت کے دوران ملک کی اعلیٰ ترین سفارت کار تھیں۔

اُنھوں نے بتایا کہ اُنھوں نے زیادہ محفوظ سرکاری سرور کی جگہ نجی سرور اس لیے استعمال کیا کیونکہ اُن کے لیے یہ زیادہ سہل تھا۔ امریکی فیڈرل بیورو آف انویسٹی گیشن حالیہ دِنوں اِس نتیجے پر پہنچا ہے کہ محکمہٴ خارجہ کی اِی میلز جو ایک صیغہٴ راز کا معاملہ ہوتا ہے، وہ ’’انتہائی لاپرواہ‘‘ ثابت ہوئیں۔ لیکن، یہ کہ، اُن پر مقدمہ دائر نہیں ہوسکتا۔

موک نے کہا ہے کہ اس چار سالہ ڈیموکریٹک کنویشن کے نتیجے میں اُن کی نامزدگی مزید پختہ ہوئی ہے، جس سے لوگوں کو اُن کے بارے میں معلومات بڑھی ہے، اور وہ جانتے ہیں کہ ہیلری پر اعتماد کیا جاسکتا ہے، کیونکہ اُنھوں نے کبھی اُنھیں مایوس نہیں کیا‘‘۔

بدھ کی رات اُن کے اہم حامیوں میں اوباما بھی شامل تھے، جن کے خطاب کے دوران کنوینشن میں موجود ہزاروں ڈیلیگیٹس میں جوش و جذبہ دیکھا گیا۔

امریکہ کے صدر براک اوباما نے ڈیموکریٹک قومی کنونشن سے خطاب کرتے ہوئے کہا کہ کوئی بھی مرد یا خاتون عہدہ صدارت کے لیے اتنا قابل نہیں رہا جتنا کہ ہلری کلنٹن ہیں۔

پینسلوینیا کے شہر فلاڈیلفیا میں جاری کنونشن میں صدر نے اپنی انتظامیہ کی کامیابیوں کو اجاگر کرنے کے علاوہ یہ وضاحت بھی کی کہ بطور امیدوار ہلری کلنٹن منصب صدارت کے لیے کس طرح موزوں ہیں کیونکہ ان کا ماننا ہے کہ ملک اس وقت ہی بہتر ہو سکتا ہے جب تمام لوگ مل کر آگے بڑھیں۔

"اس سال، انتخاب میں، میں آپ سے کہوں گا کہ آپ مایوسی اور خوف کے خلاف میرا ساتھ دیں اور ہم میں موجود بہترین کو آواز دیں اور ہلری کلنٹن کو امریکہ کی آئندہ صدر منتخب کریں، اور دنیا کو دکھائیں کہ اب بھی اس عظیم قوم کے عزم پر یقین رکھتے ہیں۔"

انھوں نے ہلری کلنٹن کے بطور وزیرخارجہ اپنے ساتھ کام کرنے کے تجربات کا بھی تذکرہ کرتے ہوئے کہا کہ صدر بننے کے لیے کسی بھی شخص کی اس زیادہ بہتر تربیت نہیں ہوسکتی۔

"جب تک آپ کام پر نہ بیٹھیں، آپ کو یہ معلوم نہیں ہو سکتا ہے کہ عالمی بحران سے کیسے نمٹنا ہے، یا نوجوان لوگوں کو کس طرح جنگ پر بھیجنا ہے۔ لیکن ہلری (اس کام میں رہی ہیں)، ایسے فیصلوں میں شریک رہی ہیں۔ وہ جانتی ہیں ایسے فیصلے کرتے ہوئے ہماری حکومت کا کیا کچھ داؤ پر ہوتا ہے، کام کرنے والے خاندانوں کو کیا کچھ داؤ پر ہوتا ہے، بزرگ شہریوں، چھوٹے کاروبار کرنے والوں کا (کیا داؤ پر لگا ہوتا ہے۔)"

صدر نے ریپبلکن صدارتی امیدوار ڈونلڈ ٹرمپ کی انتخابانی مہم کو بھی اپنی تقریر میں تنقید کا نشانہ بنایا۔

"وہ (ٹرمپ) صرف نعرے پیش کر رہے ہیں، خوف پیش کر رہے ہیں، وہ یہ کر رہے ہیں کہ لوگوں کو جتنا زیادہ خوفزدہ کریں گے تو ہو سکتا ہے کہ وہ اتنے ووٹ لے لیں کہ انتخاب میں کامیاب ہو جائیں۔"

اوباما نے ٹرمپ کی طرف سے نیٹو اتحادیوں کے لیے دیے گئے اس پیغام کا حوالہ بھی دیا کہ جس میں ان کا اصرار تھا کہ اس کے پہلے کہ امریکہ ان کی مدد کو آئے وہ اس بات کو یقینی بنائیں انھوں نے اپنی ذمہ داریاں پوری کی ہیں۔

"وہ (ٹرمپ) پوٹن سے گرمجوشی دکھا رہے ہیں، صدام حسین کی تعریف کرتے ہیں، ہمارے نیٹو اتحادیوں کو جو کہ 9/11 کے بعد ہمارے ساتھ کھڑے ہوئے، سے یہ کہہ رہے ہیں کہ انھیں اگر ہماری مدد چاہیے تو اس کے لیے انھیں پہلے قیمت ادا کرنا ہوگی۔ امریکہ کا عزم قیمت کی پرچی کے ساتھ نہیں ہوتا۔"