پاکستان تحریک انصاف (پی ٹی آئی) کے چیئرمین عمران خان نے گلیات میں میران جانی کی بلند ترین چوٹی سر کرلی۔

چوٹی سر کرنے کے بعد ان کا کہنا تھا کہ وہ اب 7 اگست کو ملک میں کرپشن کے خلاف فتح حاصل کرنے کے لیے بھی تیار ہیں۔

عمران خان ان دنوں اپنے بیٹوں کے ہمراہ گلیات کی سیر میں مصروف ہیں۔

میران جانی کی چوٹی سر کرنے کے بعد اپنے ٹوئٹ میں انہوں نے کہا کہ انہوں نے گلیات کی بلند ترین چوٹی میران جانی سر کر لی ہے اور اب وہ 7 اگست کو ملک میں کرپشن کے خلاف فتح حاصل کرنے کے لیے بھی تیار ہیں۔

یاد رہے عمران خان نے 7 اگست سے حکومت کے خلاف ملک گیر تحریک شروع کرنے کا اعلان کر رکھا ہے، اور اس سلسلے میں 7 اگست کو پشاور سے راولپنڈی کی جانب مارچ کیا جائے گا۔

وہ حکومت سے پاناما لیکس میں وزیر اعظم نواز شریف کے اہلخانہ کا نام آنے کے بعد، معاملے کی شفاف تحقیقات کے لیے عدالتی کمیشن بنانے کا بھی مطالبہ کرتے رہے ہیں۔

رواں سال اپریل میں پی ٹی آئی کے یوم تاسیس کے موقع پر عمران خان نے صوبہ سندھ میں کرپشن کے خلاف تحریک چلانے کا اعلان کیا تھا۔

تحریک انصاف کے رہنما شاہ محمود قریشی نے بعد ازاں اپوزیشن لیڈر اور پیپلز پارٹی کے سینئر رہنما سید خورشید شاہ کو یقین دہانی کرائی تھی کہ پی ٹی آئی کی کرپشن کے خلاف تحریک کسی شخص کے خلاف نہیں۔

بعد ازاں پی ٹی آئی نے پاناما لیکس میں شریف خاندان کی آف شور کمپنیوں کے انکشاف کے بعد ’رائیونڈ مارچ‘ کے لیے پیپلز پارٹی کی حمایت حاصل کرنے کی کوشش کی۔

تاہم اسے اس وقت پیچھے ہٹنا پڑا جب پیپلز پارٹی کی قیادت سے کئی ملاقاتوں کے بعد بھی وہ اس کی حمایت حاصل کرنے میں ناکام رہی۔

بعد ازاں چوہدری نثار علی خان نے عمران خان کو تجویز دی کہ وہ کرپشن کے خلاف بلاول بھٹو زرداری کو کنٹینر پر ساتھ بٹھانے سے قبل ان سے سَرے محل کے اسکینڈل سے متعلق پوچھ لیں