کالعدم کردستان ورکرز پارٹی (پی کے کے) نے جمعے کو ترکی کے جنوب مشرق میں پولیس کی ایک عمارت پر کیے جانے والے خود کش بم حملے کی ذمہ داری قبول کر لی ہے۔

اس حملے میں کم از کم گیارہ پولیس اہلکار ہلاک جبکہ 78 افراد زخمی ہو گئے تھے۔ جزیرہ ابن عمر نامی شہر میں ہونے والے اس دھماکے میں زخمی ہونے والے چار افراد کی حالت تشویشناک بتائی گئی ہے۔ یہ حملہ ایک ایسے وقت پر کیا گیا، جب ترکی گزشتہ دو روز سے شام کی سرحد کے اندر داعش کے خلاف عسکری کارروائیاں جاری رکھے ہوئے ہے۔

ترکی کے صوبے سرنک میں پولیس ہیڈ کوارٹر پر کار بم دھماکے میں 9 افراد ہلاک،64 زخمی ہوگئے ۔صوبہ

 سرنک شام اور عراق کی سرحد پر واقع ہے

یہ کار بم دھماکا سرنک کے علاقے سیزرے میں کیا گیا۔مقامی میڈیا کی ویڈیو میں دھماکے کے مقام پر بڑے پیمانے پر دھواں اٹھتا ہوا دیکھا جاسکتا ہے۔ دھماکا پولیس اسٹیشن سے 50میٹر کی دوری پر کیا گیا۔

وزارت صحت کا کہنا ہے کہ 12ایمبولینس اور دو ہیلی کاپٹر دھماکے کی جگہ روانہ کر دیئے گئے ہیں۔

صوبہ سرنک شام اور عراق کی سرحد پر واقع ہےجہاں کرد آبادی بڑی تعداد میں موجود ہے

ایک اور عالمی نشریاتی ادارے کے مطابق آج کشیدگی کی لپیٹ میں آئے ہوئےجنوب مشرقی ترکی میں کُرد باغیوں کی جانب سے کیے جانے والے ایک کار بم دھماکے کے نتیجے میں نو افراد ہلاک اور چونسٹھ زخمی ہو گئے۔

 یہ دھماکا سِرناک صوبے کے صدر مقام سِزرے میں پولیس ہیڈکوارٹرز کی عمارت سے تقریباً پچاس میٹر کے فاصلے پر ہوا۔ واضح رہے کہ گزشتہ سال امن مذاکرات معطل ہونے اور فائر بندی معاہدہ ناکام ہو جانے کے بعد سے ترک سکیورٹی فورسز اور کالعدم کردستان ورکرز پارٹی کے درمیان جھڑپوں کا سلسلہ پھر سے جاری ہے۔

ترکی نے کہا ہے کہ شام کو نسلی بنیاد پر تقسیم سے بچانے کے لیے وہ اگلے چھ ماہ تک شام میں زیادہ متحرک کردار ادا کرے گا۔ اِس بات کا اعلان وزیر اعظم بن علی یلدرم نے ہفتے کے روز کیا۔

اُنھوں نے استنبول میں اخباری نمائندوں کو بتایا کہ ’’ہم یہ کہتے ہیں کہ خونزیری بند ہونی چاہیئے۔ نوزائدہ، کمسن، بے گناہ افرادکو ہلاک نہیں ہونا چاہئیے‘‘۔

بقول اُن کے، ’’یہی وجہ ہے کہ ترکی زیادہ متحرک ہوگا تاکہ یہ کوشش کی جاسکے کہ آئندہ چھ ماہ کے دوران یہ خطرہ ٹل جائے‘‘۔

یلدرم نے مزید کہا کہ شام کے مستقبل میں شامی صدر بشارالاسد کا کوئی کردار نہیں ہے، لیکن عبوری دور کے دوران اُن کے ساتھ مذاکرات ضروری ہوں گے، چونکہ ’’آپ چاہیں نہ چاہیں، وہ اِس معاملے میں ایک کردار ہیں‘‘۔

کُرد باغی گروہ کے لیے دولت اسلامیہ کا نام استعمال کرتے ہوئے، اُن کا کہنا تھا کہ ’’عبوری دور میں (اُن کے ساتھ) بیٹھ کر بات کرنی ہوگی۔ عبوری دور کے لیے سہولت فراہم کی جائے۔ تاہم، ہم سمجھتے ہیں کہ مستقبل میں شام میں ’پی کے کے‘، داعش یا اسد نہیں ہونے چاہیئں‘‘۔

یلدرم نے پانچ برس سے جاری شام کی لڑائی کے نتیجے میں نسلی بنیادوں پر تقسیم کے جذبات کے معاملے پر تشویش کا اظہار کیا، جہاں کُرد گروہوں نے اپنے علیحدہ خطے قائم کر رکھے ہیں جو کبھی کبھار شام کی اکثریتی عرب آبادی کے ساتھ ٹکراتے ہیں۔ جمعرات کے روز شام کی فضائی افواج نے پہلی بار حسکہ میں کُرد باغیوں کے خلاف بمباری کی، جو شہر شمال مشرق میں واقع ہے جہاں کُرد اور شام کی سرکاری افواج داعش کے شدت پسندوں کے ایکساتھ لڑتے رہے ہیں۔ سنہ 2011ء جب سے خانہ جنگی کا آغاز ہوا ہے، یہ فضائی حملے حکومت شام اور کرد افواج کے درمیان سنگین محاذ آرائی خیال کی جاتی ہے۔

ترکی کُرد ورکرز پارٹی (پی کے کے) کے شدت پسندوں کے ساتھ صف آرا ہے، جب کہ سرحد پار کُردوں کے طاقت ور ہونے پر اُسے تشویش لاحق ہے، اور وہ آزادی یا خودمختاری کی کوششوں کے خلاف ہے۔

اِس کے باجود، یلدرم نے کہا ہے کہ ترکی شام کے بارے میں مایوس نہیں اور یہ کہ وہ پُراعتماد ہیں کہ ایران، خلیجی عرب ریاستیں، روس اور امریکہ مل کر اس کا حل نکال سکتے ہیں۔

یلدرم نے اِن افواہوں کو مسترد کیا کہ روس کو انسرلک کا فوجی اڈا استعمال کرنے کی اجازت دی جائے گی، جسے اِس وقت امریکی اتحاد داعش کے شدت پسندوں کے خلاف استعمال کرتا ہے۔

شامی صدر بشار الاسد کی فوج کے جنگی طیاروں نے مسلسل دوسرے روز بھی شمال مشرقی شہر الحَسَکہ کے نواح میں کرد جنگجوؤں کے ٹھکانوں کو نشانہ بنایا۔

 بدھ کے دن سے کردوں کے کنٹرول والے شہر الحَسَکہ کے گرد و نواح میں شامی فوجیوں کے ساتھ ان کرد فائٹرز کی جھڑپیں جاری ہیں۔ اب تک اس لڑائی میں دو درجن کے قریب عام شہری ہلاک ہو چکے ہیں۔

 اسی بمباری کے تناظر میں امریکا نے بھی اپنے لڑاکا طیاروں کو کسی ممکنہ کارروائی کے لیے متحرک کرنا شروع کر دیا ہے۔ جمعرات کے روز شامی جنگی ہوائی جہازوں سے حملوں کے وقت امریکی لڑاکا طیارے بھی شامی فضائی حدود میں پہنچ گئے تھے لیکن تب تک شامی طیارے حملوں کے بعد واپس جا چکے تھے۔

 ................................

ایک زخمی شامی بچے کی چونکا دینے والی تصویر نے شام میں جنگ کی ہولناکی اور المناک صورتحال کی حقیقت کا پردہ فاش کردیا ہے۔

یہ تصویر شامی صحافی کی طرف سے 17 اگست کو لی گئی ہے۔

تصویر میں ایک خوفزدہ بچہ زخمی حالت میں ایمبولینس کی سیٹ پر تنہا بیٹھا ہے اس کا معصوم چہرہ خون آلود ہے اور جسم گرد اور دھول مٹی سے اٹا ہوا ہے، جبکہ اس کے ماں باپ کا کوئی پتا نہیں۔

بچے کی تصویر اور ویڈیو کو سوشل میڈیا پر وسع پیمانے پر شیئر کیا گیا اور رونگٹے کھڑے کر دینے والی اس فوٹیج نے لوگوں کے دلوں میں شام کے بحران کے حوالے سے غم و غصہ پیدا کیا ہے۔

حکومت مخالف شامی باغیوں کے حلب میڈیا سینٹر نے بچے کی شناخت اومران داگنیش کے نام سے کی ہے جو بدھ کے روز حلب کے علاقے قطرجی میں ملٹری بمباری کے نتیجے میں زخمی ہوگیا تھا۔

باغیوں کے حامی میڈیا سینٹر کی طرف سے بدھ کی شب یو ٹیوب پر زخمی بچے کی ویڈیو فوٹیج کا اشتراک کیا گیا ہےجس میں دیکھا جا سکتا ہے کہ ایک ڈاکٹر ملبے سے زندہ بچ جانے والے بچے کو اٹھا کر ایمبولینس کی پچھلی نشست پر بٹھاتا ہے اور پھر دوسرے زخمیوں کو لانے کے لیے ایمبولینس سے باہر نکل جاتا ہے۔

اس فوٹیج کی حیران کن بات یہ ہے کہ کارٹون کے کرداروں والی ٹی شرٹ اور نیکر میں ملبوس زخمی بچہ رو نہیں رہا ہے، بلکہ وہ خاموشی سے بیٹھا رہتا ہے اور کچھ دیر بعد اپنے ہاتھ سے چہرے کی گرد کو کو صاف کرنے کی کوشش کرتا ہے۔ لیکن، ہاتھوں پر خون دیکھ کر خاموشی سے اسے سیٹ پر صاف کرتا ہے اور واپس اپنے ہاتھ گود میں رکھ لیتا ہے۔

اس کے بعد دو اور بچوں اور ایک زخمی مرد کو بھی ملبے سے نکالا جاتا ہے۔

اومران کی ویڈیو فوٹیج نے شامی مہاجر بچے ایلن کردی کی موت کے سانحے کو بھی پھر سے تازہ کردیا ہے، جس کی بے جان لاش کو گذشتہ سال ترکی کے ساحل پر اوندھے منہ پایا گیا تھا۔

اور اب اومران کی تصویر نے ایک مرتبہ پھر شام کے بحران کی طرف دنیا کی توجہ مبذول کرائی ہے، خاص طور پر اس تصویر نے باغیوں کے زیر تسلط شہر حلب میں شامیوں کی حالت زار کی تصویر کشی کی ہے۔

شام کے المیہ کی منہ بولتی تصویر اومران داگنیش

اس غیر معمولی ویڈیو فوٹیج کو دیکھ کر ایسا لگتا ہے جیسے پانچ سالہ اومران داگنیش سکتے کی حالت میں ہو۔ اسے اپنے ارد گرد کے ماحول کے بارے میں کچھ نہیں پتا ہے۔ حتیٰ کہ اسے اپنے سر پر لگے گہرے زخم کا بھی اندازا نہیں ہے جس سے بہنے والے خون نے بچے کے آدھے چہرے کو ڈھانپ رکھا ہے۔​

شامی سول ڈیفینس گروپ کے کارکنوں کے مطابق اومران داگنیش اور تین دوسرے بچوں کو بدھ کے روز شامی افواج کے فضائی حملوں سے تباہ ہونے والی ایک عمارت کے ملبے سے نکالا تھا۔

خبر رساں ادارے ایسوسی ایٹیڈ پریس کے مطابق، اومران داگنیش کو علاج کے لیے ایم ٹین اسپتال میں لے جایا گیا جسے پہلے بھی فضائی حملوں کا نشانہ بنایا گیا ہے۔

فوٹو جرنسلٹ محمد راسلان جنھوں نے یہ پر اثر فوٹیج تیار کی ہے ذرائع کو بتایا کہ فضائی بمباری کے کچھ دیر بعد امدادی کارکن اور صحافی جائے وقوعہ پر پہنچ گئے تھے جہاں عمارت کے ملبے میں پھنسے لوگوں کو بچانے کی کوششوں میں ہم زخمیوں کو ایک بالکنی سے دوسری بالکنیوں میں منتقل کر رہے تھے تبھی تین بے جان جسموں کی تلاش کے بعد زخمی بچے کو ملبے سے نکالا گیا تھا۔

راسلان کے مطابق اومران اور اس کے تین اور بہن بھائیوں کو بھی ملبے سے زخمی حالت میں نکالا گیا تھا جنھیں گہرے زخم نہیں آئےتھے۔ تاہم، ان کا کہنا تھا کہ متاثرین کو ملبے سے نکالنے کے فورا بعد ہی ان کے اپارٹمنٹ کی عمارت منہدم ہوگئی تھی۔

چھوٹے بچوں کو فوری طور پر ایمبولینس میں منتقل کیا گیا تھا۔

ایم ٹین کے ڈاکٹروں کے مطابق، فضائی حملے کے نتیجے میں آٹھ افراد ہلاک ہوئے ہیں جن میں 5 بچے بھی شامل ہیں اور 12 زخمی ہوئے ہیں۔

طبی عملے کی طرف سے علاج کےبعد سوشل میڈیا پر اومران کی ایک تصویر جاری کی گئی ہے جس میں اس کی سر پر بینڈیج ہے اور وہ لیٹا ہوا ہے۔ تاہم، ڈاکٹروں کا کہنا ہے کہ انھیں بچے کے والدین کے بارے میں کوئی اطلاع نہیں ملی ہے۔

قطرجی کے فضائی حملے میں زخمی ہونے والے چار بچوں ایک عورت اور دو نوجوان مردوں کو بھی ملبے سے نکالا گیا ہے۔

شام کا بحران اور انسانی المیہ

بحران زدہ ریاست شام متعدد تنازعات میں گھری ہوئی ہے۔ اس ملک میں خانہ جنگی کا آغاز لگ بھگ پانچ برس پہلے حکومت اور اپوزیشن کے مابین اقتدار کی جنگ سے ہوا تھا۔

صدر بشار الاسد کی افواج اور روسی فضائیہ باغیوں کے زیر تسلط شہر حلب سے قبضہ چھڑانے کی کوششوں میں مصروف ہے اور یہ شہر ہر روز فضائی حملوں کے نشانے پر ہے۔

ہیومن رائٹس واچ کے مطابق، حلب کے شہر میں اندازاً تین لاکھ افراد فضائی بمباری اور حملوں کے مسلسل خوف کے ساتھ زندگیاں گزار رہے ہیں جبکہ جنوری سے اب تک اندازاً 25 اسپتالوں اور ڈاکٹر کے کلینکس فضائی بمباری کے نتیجے میں جلے ہوئے ہیں۔

اقوام متحدہ نے شام کی حکومت سے فوری طور پر جنگ بندی کا مطالبہ کیا ہے تاکہ مشرقی حلب کے تباہ حال شہر میں امداد بھیجی جاسکے، جہاں کم ازکم چھ ہفتوں سے کوئی بین الاقوامی امداد داخل نہیں ہوسکی، جس سے اس شہر میں انسانی بحران، بھوک اور بیماریوں کے خدشات میں اضافہ ہوا ہے۔

اقوام متحدہ کے اندازے کے مطابق، شہر کی ایک تہائی آبادی بیرونی امداد پر انحصار کرتی ہے جسے کیسٹلو روڈ کے ذریعے شہر میں بھیجا جاتا ہے۔ تاہم، امدادی کارکنوں کا کہنا ہے کہ اب یہ روڈ شامی حکومت کے فضائی حملوں کے نتیجے میں بند پڑی ہے۔

روس نے کہا ہے کہ شام میں شدت پسندوں کے خلاف فضائی حملوں کے لیے پہلی بار اُس کے لڑاکا طیاروں نے ایران کے ایک ہوائی اڈے سے پرواز کی۔

روس کی وزارتِ دفاع نے کہا ہے کہ ٹی یو-22ایم3 دور مار بمبار جہاز اور ایس یو-34 محاذ جنگ پر وار کرنے والے بمبار طیارے ’ہمدان فضائی اڈے‘ سے اُڑے، جو ایران کے دارالحکومت تہران کے جنوب مغرب میں تقریباً 280 کلومیٹر دور واقع ہیں۔

اس میں کہا گیا ہے کہ لڑاکا طیاروں نے حلب، دیر الزور اور ادلب کے صوبوں میں ’’ہتھیاروں، دھماکہ خیز مواد اور ایندھن کے بڑے پانچ گوداموں‘‘؛ داعش کے تربیتی کیمپوں اور جہبت النصرہ دہشت گرد گروپوں کو نشانہ بنایا۔

روسی افواج نے گذشتہ برس ستمبر کے اواخر میں شامی صدر بشار الاسد کی حکومت کی حمایت میں فضائی حملوں کا آغاز کیا۔

یہ پہلا موقعہ تھا کہ منگل کے روز یہ کارروائی شام کے باہر سے کی گئی جس میں طویل فاصلے والے روسی طیاروں نے حصہ لیا، جنھوں نے شام کے اتحادی ایران کے ہوائی اڈے سے پرواز بھری۔

ایران کی سرکاری تحویل میں کام کرنے والے ابلاغ عامہ کے ذرائع نے ملک کی قومی سلامتی کونسل کے سربراہ، علی شامخانی کے حوالے سے بتایا ہے کہ شام میں دہشت گردی سے نمٹنے کے لیے ایران اور روس کا حکمتِ عملی پر مبنی تعاون جاری ہے، جس مشن کے لیے وہ اپنی تنصیبات استعمال کرتے ہیں۔

روس نے زور دے کر کہا ہے کہ اُس کی فضائی کارروائی کا مرکز دہشت گرد ناکہ باغی ہیں جو اسد کی مخالفت کرتے ہیں، لیکن، اُسے مغربی حکومتوں اور انسانی حقوق کے گروہوں کی جانب سے تنقید کا سامنا ہے۔

شام کا تنازع مارچ 2011میں پُرامن مظاہروں سے شروع ہوا جو جلد ہی خانہ جنگی میں بدل گیا جس میں، اقوام متحدہ کے اندازوں کے مطابق، اب تک 400000 سے زائد افراد ہلاک ہوچکے ہیں۔ اقوام متحدہ کے اعداد و شمار کے مطابق، تقریباً 50 لاکھ افراد ملک چھوڑ چکے ہیں جب کہ 66 لاکھ داخلی طور پر بے گھر ہوئے ہیں۔

شام کے شمال مغربی شہر حلب میں صدر بشارالاسد کی وفادار فوج اور باغی گروپوں کے درمیان گھمسان کی لڑائی جاری ہے اور سرکاری فوج نے سوموار کے روز شہر کے جنوب مغربی حصے میں باغیوں کی پیش قدمی روک دی ہے اور انھیں گذشتہ روز قبضے میں لیے گئے اپنے ٹھکانوں سے بھی پسپا ہونے پر مجبور کردیا ہے۔

باغی جنگجوؤں نے اتوار کے روز حلب کے جنوب مغرب میں واقع ایک سیمنٹ فیکٹری میں فوج کی پوزیشنوں کو نشانہ بنایا تھا اور ان پر قبضہ کر لیا تھا لیکن حزب اختلاف کے کارکنان اور جنگجوؤں کی ویب سائٹس نے آج بتایا ہے کہ مزاحمت کار حکومت کے ایک جوابی حملے کے بعد پسپا ہونے پر مجبور ہوگئے ہیں۔

شامی فوج کی اس پیش قدمی کی بڑی وجہ روس کے لڑاکا طیاروں کی باغیوں کے زیر قبضہ علاقوں پر تباہ کن بمباری ہے۔ان فضائی حملوں میں پیش قدمی کرنے والے باغیوں کو نشانہ بنایا گیا ہے۔روسی طیارے حلب کے علاوہ باغیوں کے زیر قبضہ نزدیکی صوبے ادلب میں بھی حملے کررہے ہیں۔

درایں اثناء روس کی ریا نیوز ایجنسی نے وزیر دفاع سرگئی شوئیگو کے حوالے سے بتایا ہے کہ روس اور امریکا شامی شہر حلب میں جنگجوؤں کے خلاف مشترکہ کارروائی کے لیے اتفاق رائے کے قریب پہنچ چکے ہیں۔

روسی وزیر دفاع کا کہنا ہے کہ ''ہم اپنے امریکی ساتھیوں سے مذاکرات کے ایک فعال مرحلے میں داخل ہوگئے ہیں۔ہم مرحلہ در مرحلہ ایک منصوبے کے نزدیک پہنچ رہے ہیں اور میں یہاں صرف حلب کی بات کررہا ہوں۔اس کے تحت ہم مشترکہ طور پر لڑائی کا آغاز کرسکیں گے تا کہ وہاں امن قائم کیا جا سکے اور لوگ اس شورش زدہ سرزمین پر اپنے گھروں کو لوٹ سکیں''۔

دوسری جانب روسی وزیر خارجہ سرگئی لاروف نے یہ شکایت کی ہے کہ شامی جنگجو حلب اور اس کے نواح میں عارضی جنگ بندی کے وقفے کو دوبارہ صف بندی اور مسلح ہونے کے لیے استعمال کررہے ہیں۔

لاروف روسی شہر یکترنبرگ میں اپنے جرمن ہم منصب فرینک والٹر اسٹینمیئر کے ساتھ مشترکہ نیوز کانفرنس سے خطاب کررہے تھے۔انھوں نے کہا کہ انھیں اس بات کا ادراک ہے کہ حلب میں امدادی سامان پہنچانے اور وہاں سے شہریوں کے انخلاء کے لیے روزانہ تین گھنٹے کے لیے جنگ بندی کا وقفہ ناکافی ہے لیکن فی الوقت اس دورانیے کو بڑھانا ممکن نہیں ہے کیونکہ اس طرح جنگجوؤں کے دوبارہ مجتمع ہونے اور مسلح ہونے کا خدشہ ہے اور وہ ماضی میں جنگ بندی کے دوران ایسا ہی کرتے رہے ہیں۔

ترکی سے ملنے والی اطلاعات سے پتا چلا ہے کہ شام اور ترکی کے درمیان قائم "طمہ" سرحدی راہداری پر ایک خود کش حملے میں کم سے کم 35 باغی ہلاک ہوگئے ہیں۔

العربیہ ڈاٹ نیٹ نے ترک ذرائع ابلاغ کے حوالے سے بتایا ہے کہ خودکش حملے میں ہلاک اور زخمی ہونے والوں کی اکثریت جیش الحر کے ارکان پر مشتمل ہے۔ یہ حملہ اس وقت کیا گیا جب شمالی حلب میں اپوزیشن کے 600 جنگجو ایک نئی مہم پر جانے کی تیاری کررہے تھے۔ اس دوران ایک خود کش بمبار ان کی صفوں میں داخل ہوا اور خود کو دھماکے سے اڑا دیا۔

الحدث چینل کے نامہ نگار کے مطابق خود کش بمبار شامی اپوزیشن کی نمائندہ فوج کی ایک بس پر سوار ہونے میں کامیاب ہوگیا تھا۔ بس میں سوار ہوتے ہی اس نے خود کو دھماکےسے اڑا دیا۔ ذرائع کا کہنا ہے کہ جیش الحر نے دو دیگر خود کش بمباروں کو کارروائی سے قبل ہی ہلاک کردیا ہے۔ اپوزیشن نے خود کش حملے کا الزام شدت پسند گروپ داعش پرعاید کیا ہے۔

قبل ازیں شام میں انسانی حقوق کی صورت حال پر نظر رکھنے والے ادارے"آبزرویٹری" کی جانب سے جاری کردہ ایک بیان میں بتایا گیا تھا کہ شام اور ترکی کی سرحد پر قائم اطمہ گذرگاہ پر ایک بس میں ہونے والے خود کش دھماکے کے نتیجے میں 15 افراد ہلاک اور کم سے کم 25 زخمی ہوگئے ہیں۔ زخمیوں میں سے بعض کی حالت نازک بیان کی جاتی ہے۔

روس کے طویل فاصلے تک مار کرنے والے چھے بمبار طیاروں نے شام کے مشرقی صوبے دیرالزور میں سخت گیر جنگجو گروپ داعش کے اسلحہ ڈپوؤں اور متعدد ٹھکانوں کو تباہ کردیا ہے۔

ماسکو میں روسی وزارت دفاع نے ایک بیان میں کہا ہے کہ ٹوپو لیف بمبار طیاروں نے اتوار کے روز داعش کے مضبوط گڑھ دیرالزور شہر کے جنوب مغرب ،مشرق اور شمال مشرق میں بمباری کی ہے اور دو کمانڈ پوسٹوں ،چھے اسلحہ ڈپوؤں ، گاڑیوں کو تباہ کردیا ہے اور بمباری میں داعش کے بڑی تعداد میں جنگجو مارے گئے ہیں۔

داعش کا دیر الزور شہر کے ایک بڑے حصے پر قبضہ ہے،اسی نام سے تیل کی دولت سے مالا مال اس صوبے کے بیشتر علاقوں پر بھی ان کا کنٹرول ہے۔داعش کے جنگجوؤں کی گذشتہ مہینوں کے دوران شامی فوج کے ساتھ اہم فوجی اڈوں پر قبضے کے لیے لڑائی ہوتی رہی ہے۔

روس اپنے اتحادی صدر بشارالاسد کی حمایت میں گذشتہ سال ستمبر سے شام میں داعش اور دوسرے باغی گروپوں کے خلاف فضائی حملے کررہا ہے اور ان حملوں ہی کی بدولت شامی فوج کو بھی کچھ سنبھالا ملا ہے۔روس کی حمایت سے شامی فورسز ملک کے دوسرے بڑے شہر حلب میں دوسرے باغی گروپوں کے خلاف لڑرہی ہیں۔

امریکا کے حمایت یافتہ عرب کرد اتحاد نے جمعے کے روز ترکی کی سرحد کے نزدیک واقع شہر منبج سے داعش کے جنگجوؤں کو گذشتہ کئی ہفتوں سے جاری شدید لڑائی کے بعد نکال باہر کیا تھا۔یہ اس جنگجو گروپ کے لیے ایک بڑا دھچکا تھا اور پینٹاگان نے ان کی شکست پر تبصرہ کرتے ہوئے کہا ہے کہ وہ اس وقت رسیوں پر چل رہے ہیں۔بہ الفاظ دیگر شام میں ان کے قدم اب اکھڑ چکے ہیں۔