شبنم کے فلمی کیریئر کا آغاز

٭3 اگست 1962ء کو پاکستان کی مشہور اور صف اول کی اداکارہ شبنم کی پہلی فلم ’’چندا‘‘ ریلیز ہوئی۔

’’چندا‘‘ کے فلم ساز ایف اے دوسانی اور احتشام تھے جب کہ اس کی ہدایات بھی احتشام نے دی تھیں۔ اس فلم کی کاسٹ میں شبنم کے علاوہ رحمن‘ سلطانہ‘ مصطفی اور سبھاش دتہ شامل تھے۔ اس فلم کی موسیقی روبن گھوش نے ترتیب دی تھی جب کہ نغمے سرور بارہ بنکوی نے تحریر کیے تھے۔ اس فلم نے نہ صرف سال کی بہترین فلم کا نگار ایوارڈ حاصل کیا بلکہ شبنم بھی بہترین معاون اداکارہ کا ایوارڈ حاصل کرنے میں کامیاب ہوگئیں۔

--------------------------------------------------------------------------------

لطیف امیر بخش کی پیدائش

٭ بلیرڈ اور اسنوکر کے قومی چیمپئن لطیف امیر بخش 3 -اگست 1947ء کو کندن نگر (اجمیر) میں پیدا ہوئے تھے۔ قیام پاکستان کے بعد ان کے والد امیر بخش کو کراچی کلب میں ٹینس مارکر کی ملازمت ملی۔ اسی کلب میں لطیف امیر بخش کو بلیرڈز اور اسنوکر سے دلچسپی پیدا ہوئی۔ کلب کے ایک ممبر رشید کریم نے ان کی حوصلہ افزائی کی اور انہیں قومی مقابلوں میں حصہ لینے کے لئے بھیجنا شروع کیا۔ 1966ء میں انہوں نے واڈی والا کپ بلیرڈ ٹورنامنٹ اور 1967ء میں مغربی پاکستان بلیرڈز چیمپئن شپ اور نیشنل بلیرڈز اینڈ اسنوکر چیمپئن شپ جیتنے کا اعزاز حاصل کیا۔ انہوں نے بین الاقوامی سطح پر بھی بلیرڈز اور اسنوکر کے کئی ٹورنامنٹس میں پاکستان کی نمائندگی کی اور متعدد اعزازات حاصل کئے۔

20جولائی 1987ء کو لطیف امیر بخش کراچی میں وفات پاگئے۔

وہ کراچی میں آسودۂ خاک ہیں

--------------------------------------------------------------------------------

لاس اینجلس اولمپکس کے انعقاد پر یادگاری ڈاک ٹکٹوں اور سووینئیر شیٹ کا اجرأ

* 3اگست1996ء کو پاکستان کے محکمہ ڈاک نے اٹلانٹا  اولمپکس کے انعقاد پر چار یادگاری ڈاک ٹکٹوں  اورایک سووینئیر شیٹ جاری کی۔ ان میں سے تین ڈاک ٹکٹ ان تین کھیلوں کے حوالے سے جاری کیے گئے تھے جن میں اس سال پاکستان نے حصہ لیا تھا۔ یہ تین کھیل تھے ہاکی، پہلوانی اور باکسنگ جبکہ چوتھے ڈاک ٹکٹ پر جدید اولمپکس کے بانی کوبرتن کی تصویر بنی تھی۔ ان ڈاک ٹکٹوں کے ساتھ جاری کی جانے والی سووینئیر شیٹ پریہ چاروں ڈاک ٹکٹ شائع کیے گئے تھے اور ان ڈاک ٹکٹوں اور سووینئیر شیٹ پر انگریزی میں

  Atlanta 1996 اور CENTENNIAL OLYMPIC GAMES

 کے الفاظ تحریر تھے۔ پانچ پانچ روپے مالیت کے ان چاروںیادگاری ڈاک ٹکٹوں اور پچیس روپے مالیت کی اس سووینئیر شیٹ کا ڈیزائن جناب فیضی امیرصدیقی نے تیار کیا تھا