سعودی عرب میں پھنسے پاکستانیوں کی حالت زار پر وزیراعظم میاں نواز شریف نے نوٹس لیتے ہوئے وزیر سمندر پار پاکستانی اور سعودی عرب میں موجود سفیر کوان افراد کی مدد کرنے کی ہدایت کردی۔

سعودی عرب میں کمانے کی غرض سے موجود سیکڑوں پاکستانیوں کو کئی ماہ سے ان کی ملازمت دینے والی کمپنیوں کی جانب سے تنخواہیں نہ دینے کے باعث مشکلات کا سامنا ہے ، اس حوالے سے ’جیو نیوز‘ کے پروگرام ’آج شاہ زیب خانزادہ کے ساتھ‘ میں چلنے والی خبر پر وزیراعظم نے نوٹس لے لیا۔

وزیراعظم نے وزیربرائے اوورسیزپاکستانیزکوسعودی عرب جانے کی ہدایت کردی کہ آپ سعودی عرب جاکرمعاملات کا جائزہ لیں۔

وزیراعظم نے وزارت خارجہ کوروزانہ کی بنیادپررپورٹ پیش کرنےکاحکم دیتے ہوئے کہا ہے کہ سعودی عرب میں پھنسے بھائیوں کی مددکےلیےہر ممکن اقدامات کریں۔

اس سے قبل سعودی عرب میں پاکستانی سفیرمنظورالحق نے پروگرام ’آج شاہ زیب خانزادہ کیساتھ‘ میں گفتگوکرتے ہوئے کہا کہ سعودی عرب میں پھنسے ہوئے پاکستانی محنت کشوں کو کھانا پہنچایا ہے، مینجمنٹ سے بات کی ہے کہ آج یا کل صبح سے باقاعدگی سے کھانا فراہم کرنا شروع کردیا جائےگا۔

پاکستانی سفیر منظورالحق نے یہ بھی کہا کہ کوشش ہے کہ پاکستانی محنت کشوں کے واجبات جلد دلائیں، سعودی حکومت نے بڑی کمپنیوں سے کہا ہے کہ مزدوروں کے واجبات ادا کریں