ایک پاکستانی ہیلی کاپٹر نے افغانستان کے صوبہ لوگر میں طالبان کے زیر قبضہ علاقے میں کریش لینڈنگ کی ہے۔ پاکستانی حکام کے مطابق خدشہ ہے کہ ہیلی کاپٹر کے عملے کو طالبان نے حراست میں لے لیا ہے۔ 

صوبہ لوگر کے گورنر کے ترجمان صمیم صالح کے مطابق طالبان نے جن لوگوں کو حراست میں لیا ہے، وہ پاکستانی ہیں۔ ترجمان کا کہنا تھا کہ ہیلی کاپٹر کو مار گرایا نہیں گیا بلکہ اس نے تکنیکی خرابی کے سبب خود ہی اس علاقے میں لینڈ کیا۔

 دو سینیئر پاکستانی حکام نے خبر رساں ادارے روئٹرز کے ساتھ گفتگو میں تصدیق کی کہ حکومت پنجاب کا ایک ہیلی کاپٹر افغانستان میں اُترا ہے۔ تاہم ان کا کہنا تھا کہ عملے کے بارے میں ابھی کوئی مصدقہ معلومات نہیں ہیں۔