اس کو پہلی نظر میں دیکھو وہ بری امام کے دربار میں بیٹھی معتکف اللہ والی لگتی ہے جس سے بے اولاد مائیں یا پھر بیٹی کی شادی کے لیئے پریشان مائیں دعا کروانے آتی ہیں ۔ جب اس کے قریب ہو کر اس کے اندر جھانکیں تو ایک ایسا گہرا سمندر کہ اس کی تہہ تک پہنچ کر موتیوں سے مالامال سیپیوں سے موتی نکالنے کے لیئے ایک لمبا وقت درکار ہو ۔ 

جب تک اس سے میری فون پر بات ہوتی رہی میں نے اس کی شخصیت ، ذات اور رویئے کے کئی پنسل اسکیچ بنائے اور خود ہی انہیں مٹا دیئے کہ میرے بنائے ہوئے عکس اس کی آواز سے مماثلت نہیں رکھتے تھے ۔ میں نے اس کی آواز سے کئی مرتبہ زہن کے قرطاس پر تصویر کا رنگ دینے کی بھی کوشش کی لیکن وہ ہر مرتبہ ایک نئی شکل میں اجاگر ہوئی ۔ اس کی زندگی کے نشیب و فراز کی کہانیاں سنیں تو خاتون ہونے کے باوجود اسے مرد آہن کہنے کو جی چاہا۔ ٹھنڈے میٹھے سرائیکی لہجے میں اردو بولنے والی اس بے چین روح کا کوئی نام بھی تو ہو گا۔ اور آپ بھی یہ سوچ رہے ہونگے کہ میں نے اس بار ایک غیر روائیتی سا تعارف شروع کیا اور نام بتائے بغیر ۔۔ بوجھو تو جانیں کی پہیلی آپ کے سامنے رکھ دی ۔ 

میں کئی سال سے اس سے ٹیلی فون پر ہی گفتگو کرتی آئی تھی۔ لیکن اسی سال فروری میں جب پاکستان کے سفر کے دوران کراچی ، لاہور ، فیصل آباد  اور مری کی مسافرت طے کی تو دو روز کے لیئے اسلام آباد بھی جانا ہوا جہاں اس مختصر ترین مدت میں جیسے مصروفیت کا وقت ایک ہفتے کے برابر تھا۔ لاہور سے پنڈی تک کا ڈائیوو کا سفر میری زندگی کا انتہائی یادگار اسفار میں سے ایک ہے ۔ اور پھر پنڈی سے اسلام آباد تک اپنی میزبان کا گھر جیسے خوابوں کے کسی جزیرے تک رسائی حاصل کرنا ہو ۔ اسلام آباد سے مری کی سڑک پر مڑتے ہوئے چند میل کے فاصلے پر بارہ کہوہ کا وہ مقام ہے جہاں سے مری کی ہواؤں کی ٹھنڈک محسوس ہونا شروع ہو جاتی ہے ۔ اسی بارہ کہوہ پر بائیں ہاتھ  پر ایک پہاڑی پر ترتیب سے بنے ہوئے چند گھروں میں  سے ایک گھر  میری دوست کوثر ثمرین کا ہے ۔ 

پہلی مرتبہ روبرو ملاقات کی کہانی ایک الگ افسانہ ہے  جسے ضرور کبھی تحریر کرنے کی کوشش کرونگی ۔ پر اس وقت تو مجھے اس کوثر ثمرین کا شکریہ ادا کرنا ہے جو جب پہلی مرتبہ اپنی بانہوں کی پوری گرفت سے مجھے گلے ملی تو میں نے بری امام کے مزار پر بیٹھی جس اللہ والی کی تصویر  سڈنی میں بیٹھ کر زہن کے قرطاس پر بنائی تھی اس کی حقیقت اور حدت دونوں سچائی کے آیئنے میں اتر آئے ۔ 

کوثر ثمرین کا تعلق پیروں فقیروں کی سر زمین سے ہے اور یہ جو وہ مجھے بری امام کے مزار کی اللہ والی سی لگتی تھی  اس کا لاشعوری تعلق اس کی جائے پیدائش مظفر گڑھ (ملتان) سے ہے جہاں قدم قدم پر پیروں فقیروں کے مزار اور آستانے موجود ہیں ۔ کوثر ثمرین کی زندگی کے کئی رخ ہیں ۔ ان میں سے کچھ جہتوں سے تو میں پہلے سے آگاہ تھی ۔۔ لیکن اس کی زندگی کے کچھ ابواب مجھ پر دو روزہ روبروملاقاتوں میں منکشف ہوئے ۔ 

میں ابھی تک یہ فیصلہ نہیں کر پائی کہ کوثر بنیادی طور پر شاعرہ ہے کہ براڈ کاسٹر ۔ کیونکہ یہی دو رخ پاکستان میں نشریات کی دنیا میں اس کی شناخت ہیں ۔۔ لیکن میرے لیئے اس کی سب سے بڑی شناخت اس کی وہ مقناطیسی شخصیت ہے جو محبت کے خمیر سے گوندھی گئی ہے ۔ مجھے یوں لگا جیسے کوثر کو ٹھوکر کھانے کے باوجود اعتبار کرنے کی سی عادت ہے ۔ آپ چاہے کوئی چیز اسکے سامنے جھوٹ ہی کہیں پر وہ آپ کا مان رکھنے کی خاطر اس کو سچ مانے گی ۔۔ اور شاید اپنے اس رویئے کی وجہ سے اسے عام زندگی میں بڑے سنگلاخ رستوں سے گزرنا پڑا ہے ۔۔ لیکن ہمارے اس مرد کے 

معاشرے  نے جسے موم کی گڑیا سمجھا تھا وہ فولاد کی عورت نکلی ۔ 

ازدواجی زندگی کے آسودہ پہلو ہوں یا دفتری معاملات میں عورت کی فوقیت ، اہلیت اور صلاحیت کو تسلیم نا کرنے کے رویئے اور ان کے اثرات کا کوثر نے  تن تنہا ڈٹ کر مقابلہ کیا ۔ اور اپنی ساتھی خواتین کے لیئے عزم و حوصلے کی ایک مثال چھوڑی ۔ 

وہ اکثر کہا کرتی ہے کہ وہ شاید غلط صدی میں پیدا ہو گئی ہے ۔ کیونکہ بقول اس کے "میں فیصلے کرتی گئی اور اپنے رستے خود بناتی گئی ۔۔۔ پیچھے مڑ کر دیکھا نہیں کہ خوف تھا کہ کہیں پتھر کی نا ہو جاؤں ۔“ کوثر نے اپنی عملی زندگی میں خود کو تیسری دنیا کی وہ عورت ثابت کیا جس نے اپنے سر کے ست رنگی دوپٹے کو اپنی فتح کا پرچم بنایا اور امرتا پریتم نا ہونے کے باوجود اس جیسی باغی ضرور بنی ۔ مجھے یاد ہے کہ جب وہ ریڈیو پاکستان کے مشکل ترین نشریاتی مرکز میں سے اسکردو ریڈیو کی پہلی خاتون اسٹیشن ڈائریکٹر مقرر ہوئی تو وہاں کے ننانوے فیصد مردوں نے اسے زہنی طور پر اپنا افسر اعلی ماننے سے انکار کر دیا ۔ اوراس نےاپنے دوسالہ قیام میں جس عزم و حوصلے کے ساتھ بدعنوان معاشرے کے بد عنوان لوگوں کا سامنا کیا وہ کامیابیوں کی ایک زندہ مثال ہے ۔ 

کوثر ثمرین کی نشریاتی زندگی  کو پہلے تو میں نے قریب سے نہیں دیکھا تھا ۔ اب جو میں اس کی مہمان ہوئی  تو اس وقت وہ  ریڈیو پاکستان کے تربیتی ادارے “ براڈکاسٹنگ اکیڈمی “ کی وائس پرنسپل پروگرام تھی ۔ لیکن چونکہ ان اداروں کو اہلیت اور صلاحیت والے لوگ درکار نہیں ہیں سو مجھے یقین ہے کہ وہ اب تک ریڈیو اکیڈمی سے بھی ٹرانسفر ہو چکی ہو گی ۔ سو اس نے   اسی مناسبت سے مجھے ریڈیو اکیڈمی میں زیر تربیت پروڈیوسرز سے گفتگو کرنے کے لیئے مدعو کر رکھا تھا ۔ اس دو روزہ گفتگو میں مجھ پر کوثر ثمرین ایک ماہر نشریات کے طور منکشف تو ہوئی ہی لیکن اس کے ارد گرد کے لوگ اسے کیسے اور کتنا چاہتے ہیں اس کا احساس بھی ہوا اور یہ تجربہ بھی ہوا کہ تہذیب کے ادارے کی اس تربیت گاہ میں بھی مردوں کا معاشرہ کیسے ایک باصلاحیت عورت کو ہر قدم پر اس کے حق سے محروم کرنا چاہتا ہے ۔ اس کے باوجود اس نے کبھی حوصلہ نہیں ہارا اور وہ اپنے حصے کا کام پوری تندہی سے کرتی رہی ۔ 

 کوثر کی زندگی کا حُسن اب اسکی بیٹی دُرنجف میں بھی جھلکتا ہے جو اسکی حیات کا محور بن چکی ہے۔ وہ در نجف کو اعلی تعلیم دلوا کر ایک مہذب اور کامیاب شہری بنانا چاہتی ہے اور میری دعا ہے کہ اللہ پاک اسکو اس حدف کو حاصل کرنے کا حوصلہ اور ہمت عطا کرے