وسیم حسن راجہ کی وفات

٭ پاکستان کے سابق آل رائونڈر ٹیسٹ کرکٹر وسیم حسن راجہ  3 جولائی 1952ء کو ملتان میں پیدا ہوئے تھے۔

1973ء میں انہوں نے نیوزی لینڈ کے خلاف اپنے ٹیسٹ کیریئر کا آغاز کیا اور مجموعی طور 57 ٹیسٹ میچوں میں پاکستان کی نمائندگی کی۔ انہوں نے مجموعی طور پر2821 رنز اسکور کئے جن میں 4 سنچریاں اور 18 نصف سنچریاں شامل تھیں۔ اس کے علاوہ انہوں نے 35.80 کی اوسط سے 51 وکٹیں بھی حاصل کیں۔ انہوں نے 54 ایک روزہ بین الاقوامی میچ بھی کھیلے اور مجموعی طور پر 728 رنز اسکور کئے۔ پاکستان کے مشہور کھلاڑی رمیز راجہ ان کے چھوٹے بھائی ہیں۔

٭23 اگست 2006ء کو وسیم حسن راجہ لندن میں ایک کلب میچ کے دوران دل کا دورہ پڑنے کی وجہ سے وفات پاگئے۔

------------------------------------------------------------------------------------------

میاں محمد سعید کی وفات

٭پاکستان کرکٹ ٹیم کے پہلے کپتان میاں محمد سعید 31 اگست 1910ء کو لاہور میں پیدا ہوئے تھے۔ انہوں نے 1929ء سے 1955ء تک فرسٹ کلاس کرکٹ کھیلی اور پاکستان کی آئی سی سی کی رکنیت سے پہلے تک پاکستانی ٹیم کے کپتان رہے۔ اس دوران انہوں نے پاکستان کے ابتدائی چھ غیر سرکاری ٹیسٹ میچوں میں پاکستان کی قیادت کی۔ 1968ء میں وہ راولپنڈی کے ایڈیشنل کمشنر کے عہدے سے ریٹائر ہوئے۔

مئی 2003ء میں انہیں کرکٹ کے لئے انجام دی گئی خدمات پر برادر ہڈ سوسائٹی آف پاکستان لاہور نے طلائی تمغہ عطا کیا تھا۔

وہ پاکستان کرکٹ بورڈ کے سابق ڈائریکٹر آپریشنز میاں یاور سعید کے والد اور نامور کرکٹر فضل محمود کے سسر تھے۔

٭23 اگست 1979ء کو میاں محمد سعید لاہور میں وفات پاگئے۔

-----------------------------------------------------------------------------------------

پا کستانی دست کاریوں کے فروغ کے لیے ڈاک ٹکٹوں کااجرأ

*23اگست 1979ء کو پاکستان کے محکمہ ڈاک نے پا کستانی دست کاریوں کے ایک سیٹ جاری کیا۔ ان ڈاک ٹکٹوں کی مالیت 40پیسے، ایک روپیہ ، ڈیڑھ روپیہ اور دو روپیہ تھی اور ان پر بالترتیب سندھی گج، پیتل کی پلیٹ، باسکٹ اورقالین کی تصاویر شائع کی گئی تھیں ۔ یہ ڈاک ٹکٹ پاکستان سیکیورٹی پرنٹنگ کارپوریشن کے جناب عادل صلاح الدین نے ڈیزائن کیے تھے۔