عراقی پارلیمان نے ملکی وزیر دفاع خالد العبیدی کو ان کے عہدے سے ہٹانے کے حق میں ووٹ دے دیا ہے۔ 

بدعنوانی کے الزامات کے باعث ان پر ملکی پارلیمان میں تحریک عدم اعتماد پیش کی گئی جسے 102 کے مقابلے میں 142 ووٹوں سے منظور کر لیا گیا۔ 

العبیدی اپنے خلاف ان الزامات کی تردید کرتے ہیں۔ ارکان پارلیمان کی طرف سے العبیدی پر الزام عائد کیا گیا تھا کہ انہوں نے کئی بلین ڈالرز ضائع کر دیے اور وہ فوج کو اس قدر کمزور کرنے کے ذمہ دار ہیں کہ وہ 2014ء میں داعش کے ہاتھوں شکست کھا گئی۔