ایک روزہ کرکٹ میں پاکستان کی پہلی سنچری

٭31 اگست 1974ء کو پاکستان نے ناٹنگھم کے مقام پر اپنا دوسرا اور انگلستان کے خلاف پہلا ایک روزہ بین الاقوامی کرکٹ میچ کھیلا۔ 50 اوورز کے اس میچ میں انگلستان نے پہلے بیٹنگ کرتے ہوئے 4 وکٹوں کے نقصان پر 244 رنز اسکور کیے جواب میں پاکستان نے 3 وکٹوں کے نقصان پر 246 رنز اسکور کیے اور یوں یہ میچ 7 وکٹوں سے جیت لیا۔ یہ کسی ایک روزہ بین الاقوامی میچ میں پاکستان کی پہلی فتح تھی۔

اس میچ میں انگلستان کے ڈیوڈ لائیڈ اور پاکستان کے ماجد خان نے سنچریاں بھی اسکور کیں۔ یوں ماجد خان وہ پہلے پاکستانی کھلاڑی بن گئے جنہوں نے ایک روزہ بین الاقوامی کرکٹ میں سنچری اسکور کی تھی۔

------------------------------------------------------------------------------------------

میاں محمد سعید کی پیدائش

٭پاکستان کرکٹ ٹیم کے پہلے کپتان میاں محمد سعید 31 اگست 1910ء کو لاہور میں پیدا ہوئے تھے۔ انہوں نے 1929ء سے 1955ء تک فرسٹ کلاس کرکٹ کھیلی اور پاکستان کی آئی سی سی کی رکنیت سے پہلے تک پاکستانی ٹیم کے کپتان رہے۔ اس دوران انہوں نے پاکستان کے ابتدائی چھ غیر سرکاری ٹیسٹ میچوں میں پاکستان کی قیادت کی۔ 1968ء میں وہ راولپنڈی کے ایڈیشنل کمشنر کے عہدے سے ریٹائر ہوئے۔

مئی 2003ء میں انہیں کرکٹ کے لئے انجام دی گئی خدمات پر برادر ہڈ سوسائٹی آف پاکستان لاہور نے طلائی تمغہ عطا کیا تھا۔

وہ پاکستان کرکٹ بورڈ کے سابق ڈائریکٹر آپریشنز میاں یاور سعید کے والد اور نامور کرکٹر فضل محمود کے سسر تھے۔

٭23 اگست 1979ء کو میاں محمد سعید لاہور میں وفات پاگئے۔

------------------------------------------------------------------------------------------

استاد رنگی خان کی وفات

٭31 اگست 1993ء کو پاکستان کے معروف موسیقار اور شہنائی اور کلارنٹ نواز استاد رنگی خان لاہور میں وفات پاگئے۔

استاد رنگی خان کا اصل نام محمد اورنگ زیب تھا۔ وہ کلاسیکی موسیقی پر مکمل عبور رکھتے تھے اور پاکستان کے بہترین شہنائی نواز شمار ہوتے تھے۔اس کے علاوہ وہ کلارنٹ بجانے میں بھی دسترس رکھتے تھے۔حکومت پاکستان نے ان کی خدمات کے اعتراف کے طور پر انہیں 1987ء میں صدارتی تمغہ برائے حسن کارکردگی عطا کیا تھا۔