ٹیسٹ کرکٹ کی نمبر ون ٹیم ، ٹیم پاکستان کو آئی سی سی کی جانب سے ٹرافی دینے کی تقریب آج لاہور کے قذافی اسٹیڈیم میں ہوگی۔

سات سال سے ہوم گراؤنڈ پر ٹیسٹ کھیلنے سے محروم ٹیم پاکستان کو ہوم گراؤنڈ پر نمبرون ہونے کی ٹرافی دی جائے گی ۔

مصباح کی قیادت میں گرین شرٹس نے آسٹریلیا کو مارا، انگلینڈ کا پچھاڑا ،سری لنکا اور بنگلا دیش کو ہرایا۔ٹیم پاکستان نے بھارت سمیت ہر ٹیم کو پیچھے دھکیلا اور دنیا کی بہترین ٹیم کا تاج اپنے سر سجالیا۔

اس وقت آئی سی سی ٹیسٹ رینکنگ میں پاکستان ایک سو گیارہ پوائنٹس کے ساتھ سب سے اوپر ہے۔

انٹرنیشنل کرکٹ کونسل کے چیف ایگزیکٹو ڈیوڈ رچرڈسن آج قذافی اسٹیڈیم لاہور میں ہونے والی پُروقار تقریب میں گُرز نما ٹرافی پاکستان کے کامیاب ترین کپتان کو پیش کریں گے