بھارت میں انتہا پسندی کی انتہا کردی گئی، بھارتی انتہا پسند تنظیم نے نواز شریف کا سر کاٹ کر لانے والے کے لیے ایک کروڑ روپے کے انعام کا اعلان کر دیا۔

مودی سرکار کا جنگی جنون دیکھ کر بھارتی میڈیا بھی پاگل ہوگیا ،بھارتی ٹی وی پاکستان کے خلاف ہرزہ سرائی میں ساری حدیں پار کرگیا، انتہا پسند تنظیم کا بیان چلا بھی دیا ۔

بھارت میں انتہاپسندی کی انتہا، یہ ہے بھارت کا اصل چہرہ، مظلوم کشمیریوں کی حمایت میں وزیراعظم پاکستان کی دو ٹوک تقریر سنی تو انتہاپسندوں کے تن بدن میں آگ لگ گئی،

بھارتی حکمراں جماعت بی جے پی کی اتحادی ایک انتہاپسند جماعت کے رہنما نے اپنے کارندوں کو نہ صرف وزیر اعظم پاکستان کے قتل پر اکسانے پر اتر آیا،بلکہ سر کاٹ کر لانے والے ایک کروڑ روپے دینے کا بھی اعلان کردیا۔

کم تو بھارتی میڈیا بھی نہیں جس نے زرد صحافت کے تمام ریکارڈز توڑتے ہوئے نہ صرف یہ بیان نشر کیا بلکہ اس کی بالواسطہ حمایت بھی کرتا رہا، جنگی جنون میں اوقات سے گزر گیا، باؤلا ہوکر اخلاقیات اور تہذیب کا بھی سر قلم کر دیا۔

دوسری طرف مودی سرکار کو بھی اپنے گریبان میں جھانکنے کی ضرورت ہے، ایک جانب پاکستان پر دہشت گردی کا الزام لگاتی ہے لیکن قومی ٹیلی ویژن پر ایک انتہاپسند کی جانب سے سرکاٹنے کا بیان ٹیلی کاسٹ کروا کر ثابت کرتی ہے کہ اس سے بڑا ریاستی دہشت گرد دنیا میں اور کوئی نہیں۔