مصری ٹیلی وژن کے مطابق ایک سینیئر پولیس افسر کے قتل میں ملوث ہونے کے جرم میں ہفتے کے روز ایک عدالت نے سات افراد کو تختہٴ دار پر لٹکانے کا حکم دیا ہے۔ پولیس افسر جنرل نبیل فراج کو تین برس قبل دارالحکومت قاہرہ کے نواحی علاقے کِرداسہ میں اُس وقت قتل کیا گیا تھا جب وہ ایک ٹھکانے پر مارے گئے پولیس چھاپے میں شریک تھے۔ 

ان ملزمان کو پہلے بھی سزا سنائی گئی تھی لیکن اعلیٰ عدالت نے مقدمے کی ازسرنو شنوائی کا حکم دیا تھا۔ گیزا کی فوجداری عدالت نے مقدمے کی تمام کارروائی دوبارہ مکمل کرتے ہوئے سات ملزمان کو ایک مرتبہ پھر موت کی سزا سنائی ہے۔ 

عدالت نے پانچ دوسرے ملزمان کو دس برس کی قید کا حکم دیا ہے۔ اس فیصلے کے خلاف اعلیٰ عدالت میں اپیل کی جا سکتی ہے۔