لاکھوں لوگ اٹلی کی سرکاری لاٹری جیت لینے اور یورپ میں آج تک کے سب سے بڑے 19 کروڑ 40 لاکھ ڈالر کے جیک پاٹ کو سمیٹ لینے کا خواب دیکھ رہے ہیں۔

جنوری سے کوئى بھی شخص سُوپرینا لوٹو کے اُن چھ خفیہ اعداد کی ترتیب کا اندازہ نہیں لگا سکا، جو اس لاٹری کی کلید ہے۔ چنانچہ جیک پاٹ بڑھتے بڑھتے ایک ریکارڈ کی حد تک پہنچ گیا ہے۔ اٹلی اور بہت سے دوسرے ملکوں کے لوگوں کو پیر کی رات کا شدّت سے انتظار ہے، جب لاٹری کے نتیجے کا اعلان کیا جائےگا۔

جہاں تک اس لاٹری کو جیتنے کے امکان کا تعلق ہے، تو ریاضی کی بنیاد پر یہ کہا جاسکتا ہے کہ لاٹری کا وہ ٹکٹ، جس کے نمبر چھ اعداد کی 62 کروڑ 20 لاکھ ترتیبوں میں سے کسی ایک مخصوص ترتیب میں ہوں گے، وہ جیک پاٹ جیت لے گا۔ گویا کسی ایک ٹکٹ کی درست ترتیب کا امکان 62 کروڑ میں سے ایک ہے۔

جیت کے اس قدر موہوم امکان کے باوجود بہت سے لوگوں کے لاٹری کے بخارکی شدت میں کوئى کمی نہیں آئى۔

لاٹری کا ٹکٹ صرف ایک یورو کا ہے اور لاکھوں لوگ دل میں کروڑ پتی بن جانے کی آروزو لیے ٹکٹ خریدنے کے لیے قطاروں میں کھڑے ہیں۔

بشکریہ۔وائس آف امریکہ