لبوں پر تبسم کا زیور عیاں تھا
دل و جاں میں دردِ محبت نہاں تھا

رہِ عشق میں ہر قدم امتحاں تھا
بہاروں کا موسم بھی یکسر خزاں تھا

گئے تم تو رونق گئی اس جہاں کی
سُنا ہے یہ زنداں بھی رشکِ جناں تھا

کٹی دربدر عمر آشفتگی میں
نہ اپنا ہی گھر نہ ترا آستاں تھا

مرے دل کی باتیں زمانے کے لب پر
وہ دشمن ہوا جو مرا رازداں تھا

نئی نسل کو دیکھ سر دُھن رہا ہے
جو روشن خیالی کا خود ترجماں تھا

میں رویا تری سرخ تحریر پڑھ کر
مژہ تھی کہ خامہ ترا خونچکاں تھا

جوانوں میں بوڑھا ہے مشہور دیکھو
وہ عامر بھی سُنتے ہیں اک دن جواں تھا