حسبِ عادت ہم پھر غائب ہو گئے تھے اور آج کل زیادہ مصروف ہو گئے ہیں وجہ یہ ہے کہ آپی ہم اپنے بیٹے محمد انور کے ساتھ 31 مئی کو عمرہ کی ادائیگی کے لیے حجاز مقدس روانہ ہونگے عالمی اخبار کے تمام احباب اور خصوصا آپ ہماری دعاوں میں شامل رہیں گی ، ابھی ہمیں آپ کی دعاوں کی ضرورت ہے اللہ کرے یہ سفر بخیر و عافیت ہو

طالبِ دعا
آپکا بھائی
جعفر حسین
(آیئے ہم سب مل کر دعاؤں کہ لسٹ جعفر بھائی کو دیں اور ان کے لئے ہر قدم پر آسانی کی دعائیں کریں )

نمی دانم کہ آخر چوں دمِ دیدار می رقصم
مگر نازم بایں ذوقے کہ پیشِِ یار می رقصم

(مجھےنہیں معلوم کہ آخر دیدار کے وقت میں کیوں رقصاں ھوں، لیکن اپنے اس ذوق پر نازاں ہوں کہ اپنے یار کے سامنے رقصاں ھوں)

تو ہر دم می سرائی نغمہ و ہر بار می رقصم
بہر طرزے کہ رقصانی منم اے یار می رقصم

(توہر وقت جب بھی مجھے نغمہ سناتا ہے، میں ہر بار رقصاں ھوں، اور جس طرز پر بھی تو رقص کراتا ہے، اے یار میں رقصاں ھوں)

سراپا بر سراپائے خودم از بیخودی قربان
بگرد مرکزِ خود صورتِ پرکار می رقصم

(سر سے پاؤں تک جو میرا حال ہےاس بیخودی پر میں قربان جاؤں،کہ پرکار کی طرح اپنے ہی گرد رقصاں ھوں)

خوشا رندی کہ پامالش کنم صد پارسائی را
زہے تقویٰ کہ من با جبّہ و دستار می رقصم

(واہ ! مے نوشی کہ جس کیلیے میں نے سینکڑوں پارسائیوں کو پامال کر دیا، خوب! تقویٰ کہ میں جبہ و دستار کے ساتھ رقصاں ھوں)

مرا طعنہ مزن اے مدعی طرزِ ادائیم بیں
منم رندے خراباتی سرِ بازار می رقصم

(اے ظاہر دیکھنے والے مدعی !مجھے طعنہ مت مار،میں تو شراب خانے کا مے نوش ہوں کہ سرِ بازار رقصاں ھوں)

تُو آں قاتل کہ از بہرِ تماشا خونِ من ریزی
من آں بسمل کہ زیرِ خنجرِ خونخوار می رقصم

(تُو وہ قاتل ہے کہ تماشے کے لیے میرا خون بہاتا ہے اور میں وہ بسمل ہوں کہ خونخوار خنجر کے نیچے رقصاں ھوں)

بیا جاناں تماشا کن کہ در انبوہِ جانبازاں
بہ صد سامانِ رسوائی سرِ بازار می رقصم

(آہ، اے محبوب ! اورتماشا دیکھ کہ جانبازوں کی بھِیڑ میں، میں سینکڑوں رسوائیوں کےسامان کےساتھ ،سر بازار رقصاں ھوں)

اگرچہ قطرۂ شبنم نپوئید بر سرِ خارے
منم آں قطرۂ شبنم بنوکِ خار می رقصم

(اگرچہ شبنم کا قطرہ کانٹے پر نہیں پڑتا لیکن میں شبنم کا وہ قطرہ ہوں کہ کانٹے کی نوک پر رقصاں ھوں)

کہ عشقِ دوست ہر ساعت دروں نار می رقصم
گاہےبر خاک می غلتم , گاہے بر خار می رقصم

(عشق کا دوست تو ہر گھڑی آگ میں ناچتا ہے،کبھی تو میں خاک میں مل جاتا ہوں ،کبھی کانٹے پر رقصاں ھوں)

منم عثمانِ ھارونی کہ یارے شیخِ منصورم
ملامت می کند خلقے و من برَ،دار می رقصم

(میں عثمان ھارونی ،شیخ حسین بن منصور حلاج کا دوست ہوں، مجھے خلق ملامت کرتی ہے اور میں سولی پررقصاں ھوں)

کلام ؛ حضرت عثمان ھارونی رحمة اللہ علیہ……

(تصویر کی سلیکشن کے لئے عالمی اخبار کی بلاگ فیملی کے محترم شاہد اشتیاق بیگ اور حضرت عثمان ہارونی رحمة اللہ علیہ کے فارسی کلام کے اردو ترجمے کے لئے اپنی بہت ہی عزیز دوست ناز بٹ کی بے حد ممنون ہوں )

عدنان شرجیل ملک کی اپنڈکس پھٹ جانے سے زندگی کو جو خطرہ پیدا ہوا تھا وہ گروس ہوم سٹڈ کے ڈاکٹروں نے تین گھنٹے سے زیادہ وقت لگا کر کامیاب آپریشن کر کے فوری خطرہ تو دور کر دیا ہے لیکن ڈاکٹروں کے بقول ابھی انہیں لگ بھگ دو ہفتے ہسپتال میں رہنا پڑے گا
مزید پڑھنے کے لیئے لنک

22 جمادی الثانی امام الصحابہ ، سید المؤمنین ، خسر رسول ، یار غار ، امیرالمؤمین سیدنا ابوبکر صدیق رضی اللہ عنہ کا یوم وصال ہے ۔

آں آمن الناس برمولائے ما
آں حکیم اول سہنائے ما
ہمت او کشت ملت راچوں ابر
ثانی اسلام و غار بدر و قبر
( علامہ محمد اقبال رحمۃ اللہ )

حضرت ابوبکر صدیق رضی اللہ عنہ کی شخصیت کسی تعارف کی محتاج نہیں ہے ، آپ رضی اللہ تعالی عنہ آنحضرت صلی اللہ علیہ وسلم کے بچپن کے دیرینہ دوست اور سفر و حضر کے ساتھی تھے ، جب آپ صلی اللہ علیہ وسلم نے اپنی نبوت کا اعلان کیا ، تو سب سے پہلے آپ کو یہ شرف حاصل ہوا ، کہ آپ نے آپ صلی اللہ علیہ وسلم کی رسالت کی تصدیق کی ۔آپ غار ثور میں رسول محمد صلی علیہ وسلم کے ساتھ رہے ، جنگ بدر میں بھی ساتھ رہے اور رسول محمد صلی علیہ وسلم کے ساتھ پہلو اقدس میں مسجد نبوی ہی میں دفن ہوئے ۔
آصف احمد بھٹی

ماں
مجھے یا دہے وہ دن جب میں نے تجھے خود سے الگ دیکھا تھا
خود کو تجھ سے بڑا سمجھا تھا
اپنی عقل کل سے تیری محبت کو پرکھا تھا
اپنی گڑیوں کو تجھ سے “تیری نہیں “ کہہ کر چھینا تھا
خود کھانے کی ضد میں تیرے ہاتھوں کو جھٹکا تھا
تیرا ہاتھ پکڑنے کی بجائے دیواروں کو سہارا سمجھا تھا
میرے ہاتھ میں کئی کتابیں تھیں اور تجھے علم کی پڑی تھی
کتنی آسانی سے “تجھے کچھ نہیں آتا ماں “ یہ کہہ دیا تھا
اور
تو نے بھی تو ہنس کر کہہ دیا تھا ۔۔ مجھے بھی بتاؤ نا کیا لکھا ہے ان میں
وہ تیرا میرے ساتھ دن رات کا جاگنا
مجھے ہر آفت سے محفوظ رہنے کی دعا دینا
میری دوستوں کی لمبی فہرستیں ۔۔ اور تیرا مسکرا دینا
وہ میری لغزشیں
وہ میری نافرمانیاں
وہ میری نادانیاں
سب کچھ اپنے آنچل میں چھپا کر سب سے چھپا لینا
میری آنکھوں میں تیری یادیں دعاؤں کی صورت نم ہیں
میری اچھی ماں ۔۔ سنو ۔۔
میری بیٹی اب بڑی ہو گئی ہے
میری عقل اور سمجھ سے بھی بڑی ۔۔
مجھے معاف کر دو ماں ۔۔۔ بس ایک شکوہ ہے میراتجھ سے
میں تجھ جیسی ہوتی ۔۔ یہ دعا کیوں نہیں کی تھی ۔۔۔!

ڈاکٹر نگہت نسیم

ڈاکٹر صاحب دو ہزار آٹھ میں محترم المقام جناب صفدر ہمدانی کے اعزاز میں ہونے والا مشاعرہ جو میرے ہی گھر پر منعقد کیا گیا تھا . اس میں شدید بارش کے باوجود فریدہ کے ساتھ پہنچے تھے اور ہر شاعر کو بڑھ بڑھ کر داد سے بھی نواز رہے تھے .. ان کی دھیمی دھیمی مسکراتی ہوئی باتوں میں بھی صرف فریدہ کا زکر رہتا تھا . ڈاکٹر صاحب بے حد مہمان نواز تھے . سڈنی میں تقریبا ہم سب کو ان کے گھر کئی بار جانے کا اعزاز حاصل رہا . پھر سڈنی میں آنے والے کم و بیش ہر شاعر ادیب ان کے گھر ضرور مدعو ہوتے تھے ..

اللہ کریم سے دعا ہے اپنے حبیب پاک کے صدقے اور ان کی آل پاک کے صدقے ڈاکٹر زکریا لاکھانی کو اپنی جوار رحمت میں جگہ عطا فرمائے اور ہماری بہن ، ہماری دوست فریدہ کو صبر جمیل عطا فرمائے …

فریدہ اس مشکل وقت میں ، دکھ کی اس گھڑی میں ہم سب تمہارے ساتھ ہیں اورتمہارے لئے حوصلے اور ہمت کی بہت ساری دعائیں کررہے ہیں .. اے اللہ کریم ہم سب کی دعاؤں کو اس خانوادے کے حق میں قبول فرما لے ..آمین ثمہ آمین

کیا جانیں

جو ہر دَم سُکھ میں رہتے ہوں
وہ دکھ کی مار کو کیا جانیں
نرم صوفوں پر دھنسنے والے
تختوں کی سختی کیا جانیں
جو سوتے ہیں سیجوں پر وہ
بانوں کی چبھن کو کیا جانیں
جو عادی ہوئے سائے کے وہ
تپتی دو پہر یں کیا جا نیں
جو چلتے ہوں قالینوں پر
پاؤں کے چھالے کیا جانیں
جو سُکھ کی نیندیں سوتے ہوں
خوابوں کی ازیت کیا جانیں
جن کے ہاتھوں میں پھول ہی پھول
کانٹوں کی چبھن کو کیا جانیں
ہنستے بستے گھر ہوں جن کے
وہ سونے آنگن کیا جانیں
جن کے رشتے ساتھ ہیں اُن کے
وہ تنہا ئی غم کی کیا جانیں
اونچے گھر میں رہنے والے
جھگی کے دکھ کو کیا جانیں
جو سیر ہوں لب ہر شربت سے
وہ کانٹے حلق کے کیا جانیں
جو پیٹ بھرے ہوں وہ اُمراء
وہ بھوک کی آگ کو کیا جانیں
جِن کے تنوں پر پوشاکیں ہوں
وہ ننگے تنوں کو کیا جانیں
ہوں جن کے کاروبار رواں
ہڑتال کے دکھ کو کیا جانیں
جو بنے ہمارے امیں بھی ہیں
وہ با رِ ا مانت کیا جا نیں
بس نعرہ یہ ہے جینے دو
ہم سیاسی چالیں کیا جانیں
جب آگ بھری ہو ذہنوں میں
ہوتی ہے محبت کیا جانیں
حاکم بن کر لو ٹنے والے
غریب کے دکھ کو کیا جانیں
میری تو بس ہے یہ ہی دعا
آنکھیں کھولیں خود کو جانیں
عا لم آرا شا ید تم کو !
پاگل سمجھیں پاگل جانیں

میں نہیں جانتی تھی کہ یہ لمحہ مجھے کتنا امیر ترین کر جائے گا ۔ یہ ان دنوں کی بات جب میں 2005 میں لیور ہوپسپٹل میں نئی نئی سائیکاٹری کی پوسٹنگ پر آئی تھی ۔ میری ڈیوٹی ہفتے کے روز تھی ۔ مجھے ریسپشن سے کال ملی کہ ایک مریضہ آئی ہے اور پولیس بھی ساتھہ ہے ۔ وجہ یہ تھی کہ اس کے پڑوسیوں نے پولیس بلوائی تھی کہ یہ مریضہ خود کو مارنا چاہتی ہے ۔ اور چھری سے اپنی کلائی کاٹ ڈالی ہے ۔ ابتدائی طبی امداد کے بعد جب میں نے اسے نفیساتی تجزیہ کے لئے دیکھا تو اس نے بتا یا کہ اس کی پانچ سالہ بیٹی کو پیدائیش کے وقت سے ہی گورمنٹ نے لے لیا تھا کہ اس کے گھر میں اس کا شوہر ہر وقت لڑتا رہتا تھا (ڈومیسٹک وائیلنس ) اور وہ دونوں کبھی کبھی ڈرگس بھی لے لیتے تھے ۔

بچی کے جدا ہو جانے کے بعد ان دونوں نے ری ہیبلیٹیشن سے علاج کروایا اور اب وہ دونوں گورمنٹ کو ثبوت دینے کے کی کوشش میں مختلف کورس وغیرہ بھی کر رہے تھے ۔ انہیں پہلے خود گورمنٹ کے آفس جا کر اپنی بچی سے ملنا پڑتا تھا ۔ پر آج پہلی بار انہیں اپنی بیٹی کو گھر لے جانے کی اجازت ملی تھی ۔ اس کی بیٹی کو پمپکن سوپ بہت پسند تھا ۔ پمپکن (میٹھا کدو)کو چھیلتے ہوئے اسے کلائی میں چھری لگ گئی ۔ جس کو اس کی پڑوسن نے دیکھ لیا ۔ اس نے روتے ہوئے مجھ سے التجا کی کسی طرح بھی اس پر یقین کر لوں ورنہ اس کی بیٹی کبھی اس کے گھر واپس نہیں آ سکے گی ۔ اوراب اس کی بیٹی کے آنے میں صرف 30 منٹ بچے ہیں ۔ اس نے اور اس کے شوہر نے مجھے یہ بھی کہا کہ ابھی اسے صرف ایک گھنٹہ کے لئے جانے دوں وہ دونوں بعد میں دوبارہ آجائیں گے اور جیسا میں کہونگی وہ وہی کریں گے ۔۔

جانے اس لمحے میں کیا تھا کہ مجھے لگا جیسے مجھے ان کی مدد کرنی چاہئے ۔۔ مدد کی مد میں اعتبار وہ بھی ایک مریضہ پر جو پہلی بار میرے پاس آئی تھی بلکہ لائی گئی تھی ۔ میں نے اسے جانے دیا ۔ صرف یہ کہا کہ مجھے فون پر بتا دے کہ سب خیر ہے اور اس کی بیٹی ان سے مل کر واپس چلی گئی ہے ۔

ٹھیک ایک گھنٹہ بعد میرا نام ایمرجنسی ڈیسک سے مائک پر پکارا گیا۔ اف قسم کھا کر کہتی ہوں کہ میری بس جان نکلنے والی تھی کیونکہ مجھے میرا اعتبار دھوکہ بھی دے سکتا تھا ۔ میں اس ڈیسک تک کیسے پہنچی نہیں جانتی ۔ پر جب میں وہاں پہنچی تو ریسپشنسٹ نے بتایا کہ کوئی میری مریضہ اپنے شوہر کے ساتھ آئی تھی اور وہ یہ ایک کارڈ اور خوبصورت پھولوں کا گلدستہ تمہارے لئے دے گئے ہیں ۔

میری آنکھیں تشکر سے نم ہو گئیں ۔۔ کارڈ پر لکھا تھا “ ڈیر ڈاکٹر نسیم تمہارے اعتبار نے ہمیں جینا سکھا دیا اور ہمیں جینے کی وجہ بھی دے دی ۔ ہم تمہارا شکریہ کسی بھی لفظوں میں ادا نہیں کر سکتے بس اتنا کہنا چاہتے ہیں کہ اپنے مریضوں پر اپنے اعتبار کوہمیشہ قائم رکھنا “

میں اس کے چہرے کو ۔۔۔ اس کی زخمی کلائی کو ۔۔۔ اس کی ملتجی نظروں کو ۔۔اس کے کارڈ ۔۔ اس کے گلدستے کو ۔۔ اس کے یقین کو کبھی نہیں بھول سکی ۔۔ اس چند لمحوں نے ، اس اجنبی ماں نے مجھے سر سے پیر تک بدل ڈالا ۔۔

کاش وہ مجھے کبھی دوبارہ مل جائے تو میں سب سے پہلے اس کا شکریہ ادا کروں اور پھر کہوں کہ میں نے اس کی بات مانی ہے اوراپنے مریضوں پر اعتبار کرنے میں ہمیشہ پہل کی ہے اور میرے اس اعتبار نے مجھے بہت اچھا ڈاکٹر بنایا ہے ۔ اتنا اچھا کہ میرے مریض مجھ سے بے حد محبت کرتے ہیں ۔ میرے لئے مندر ، مسجد ، گردوارے ، چرچ ۔۔ جہاں کہی بھی ہوں دعا کرتے ہیں ۔۔۔

میری دعا ہے تم جہاں کہی بھی ہو محفوظ ہو اور اپنے اہل خانہ کے ساتھ خوش رہو ۔۔ آمین

یہ سب میں نے اس وقت سوچا جب میں اپنے بیٹے کی Graduation Day پر اس کی یونیورسٹی آف ٹیکنولوجی ،سڈنی (UTS)کے کشادہ ہال میں آفتاب کے ساتھ بیٹھی ہوئی تھی اور میرے سامنے میرا بیٹا محمد منیب آفتاب اسٹیج پربیچلر آف لاء کی ڈگری لیتے ہوئے چانسلروکی سارا سے ہاتھ ملا رہاتھا ۔ میری آنکھیں جھلملا گئیں اور منظر بدل گیا ۔ میرا تین سال بیٹا کا مونٹیسوری ، اپنے پہلے اسکول کے سامنے میر اہاتھ تھامے کھڑا تھا ۔ آفتاب اس وقت بھی منظر کوقید کر رہے تھے اور آج کے لمحوں کو بھی تصویری روپ دے رہے تھے ۔ میں اس منظر میں کھو کر تالیاں بجانا ہی بھول گئیں ۔۔۔

چانسلر وکی سارا کو دیکھ کر میری آنکھیں محبت اور تشکر سے بھیگ گئیں ۔ انہوں نے پہلے ہم سب والدین سے کہا کہ اپنے بچوں کو شاباش دیں اور تالیاں بجا کر نہ صرف ان کا استقبال کریں بلکہ انہیں اس شاندار دن کی کامیابی کی مبارکباد بھی دیں ۔ پھر انہوں نے کہا کہ گریجویٹس اپنے ماں باپ اور دوستوں کے تعاون پر تالیاں بجا کر ان شکریہ ادا کریں کہ ان کی بے لوث محبت اور شفقت سے آپ سب نے یہ ڈگری لی ہے ۔۔

چانسلر کی باتیں مجھے کہیں اور لئے جا رہی تھیں وہ کہہ رہی تھیں کہ گریجویٹس میری دو باتیں ہمیشہ یاد رکھئے گا ۔۔۔ ایک یہ کہ “ یہ دنیا اتنی ہی خوبصورت ہوگی جتنا تم حصہ دار بنو گے ، جتنی تم اسے اپنے اچھے عمل اور کردار سے بنا جاؤ گے ۔۔ سو تم میں سے ہرگریجویٹ یہ آج کے دن سے اپنی انفرادی کوششوں سے اس دنیا کو دوسروں کے لئے خوبصورت بناتے رہنے کی کوشش کرنی ہے “ ۔۔ دوسری بات یہ کہ ہمیشہ خود پر یقین رکھنا ۔ اپنی قابلیت پر بھروسہ ہی اصل منزل ہے “ ۔۔۔ پھر انہوں نے کہا کہ ایک بات میری خواہش ہے چاہے مانویا نہ مانو پر سن ضرور لو اور وہ یہ ہے کہ “ یونیورسٹی سے تعلق کبھی نہ توڑنا ، کسی نہ کسی بہانے اس سے جڑے رہنا “ ۔۔

تقریب میں 400 افارد شامل تھے جو واں 132 کونوکیشین ڈے منانے پہنچے تھے اور اب تک اس یونیورسٹی سے ایک لاکھ چالیس ہزار اسٹوڈنٹ مختلف ڈگریاں لے کر دنیا میں اپنا مقام بنا چکے ہیں ۔ اتنی پر وقار تقریب کے اختتام پر یونیورسٹی کی جانب سے مہمانوں کے لئے چائے کا انتظام کیا گیا تھا ۔ اس دوران اراکین ، ڈین اور دیگر اساتذا اور چانسلروکی سارا کے ساتھ ساتھ باری باری مہمانوں سے ملتے رہے ۔ میری حیرت دیدنی تھی جب چانسلر زمین پر بیٹھ کر ویل چیئر پر بیٹھی کسی بچے کی نانی یا دادی سے ان کے اس موقع پر آنے کا شکریہ ادا کر رہی تھیں ۔ پھر وہ ہماری طرف متوجہ ہوئیں اور ہمارا شکریہ ادا کیا کہ اپنے بچے کو اس قابل بنایا کہ یونیورسٹی تک پہنچ سکے ۔ یوں ہم سب والدین نے ایک دوسرے کی محنتوں کو سراہا اور مل کر اپنے بچوں کو خوشیاں مناتے دیکھا ۔۔۔۔ ہر طرف کیمرے اور فلیش لائٹ ۔۔ جیسے ہر منظر ٹھہرنے لگا تھا ۔۔۔

اتنے میں منیب بھی وہاں آگیا ۔ اس نے سب کو بتایا کہ اس کی قانون کی ڈگری کے اصل حقدار اور وارث اس کے ماں باپ ہیں ۔۔۔ پھر اس نے ہنستے ہوئے اپنے سر سے ٹوپی اتار کر اپنے والد آفتاب کے سر پر سجا دی اور پھرپیار سے میرے سر پر ۔۔۔۔ مجھے یوں لگا کہ جیسے مجھے ماں ہونے کی ڈگری مل گئی ہو ۔۔

مجھے یقین ہے کہ انقلاب آئے گا ۔ میرے لئے یہی انقلاب ہے کہ ہمارے اندر شعور نے اپنی آنکھیں کھول لی ہیں ۔ ہمیں اچھے برے کی تمیز ہونے لگی ہے ۔ ہمیں اپنے پرائے میں فرق سمجھ آنے لگا ہے اور سب سے بڑی بات ہم سب کو اپنی شناخت کی فکر پڑ گئی ہے ۔

یہی تو نشانیاں ہوا کرتی ہیں ۔ مومن کبھی بھی نا امید نہیں ہو سکتا اور نہ ہی ایک ہی سوراخ سے دو بار ڈسا جا سکتا ہے ۔ جسے ان باتوں کی سمجھ آ گئی سمجھئے وہی آزاد ہو گیا ۔

مجھے ایک بڑی اچھی سی بات یاد آئی سوچ رہی ہوں کہ اتنی پیاری محفل میں کر ہی دوں ۔ بات یہ ہے کچھ پرندوں کاگزر ایک جنگل سے ہوا ۔ آپ تو جانتے ہی ہیں کہ پرندے ہم انسانوں کی طرح تنہا نہیں بلکہ اتفاق پر یقین رکھتے ہیں اور ایک ساتھ ہی اڑتے ہیں ۔

ہوا یوں کہ ان کا گزر ایک ایسے جنگل سے ہوا جہاں آگ لگی ہوئی تھی ۔ ان پربدوں میں سے ایک چڑیا اڑی اور نزدیک ہی کنویں سے اپنی چونچ میں ایک قطرہ پانی کالا کر اس آگ پر ڈالنے لگی ۔ اس کے بار بار کے عمل پر باقی پرندے ہنس پڑے اور کہنے لگے اتنی بڑی آگ پر تمہارا لایا ہوا پانی کا ایک قطرہ کیا کر سکتا ہے ۔

پتہ ہے وہ چڑیا کیا بولی ۔ اس نے کہا کہ میں جانتی ہوں کہ ایک قطرہ آب آگ نہیں بجھا سکتا پر روز حشر میرا نام آگ بجھانے والوں میں ہو گا تماشہ دیکھنے والوں میں نہیں اور نہ آگ لگانے والوں میں ۔

میں اس چڑیا میں خود کو دیکھتی ہوں اور میں اپنے لکھے ہوئے ہر لفظ کو ، اپنے ہر خیال کو ، اپنی کہی ہر بات کو اسی طرح مثبت رکھنا چاہتی ہوں کیونکہ میرا یقین ہے کہ اگر اللہ کریم پاکستان کو اسی وقت درست کرنا چاہتا ہوتا تو اس کے لئے کیا بڑی بات تھی ۔ اصل میں تو وہ یہ دیکھنا چاہتا ہے کہ کون قطرہ آب سے جنگل کی آگ بجھانا چاہتا ہے اور کون آگ لگانا چاہتا ہے

شاعری :-

کلیات اقبال – علامہ محمد اقبال
مسدس حالی – الطاف حسین حالی
آس – بشیر بدر
آسمان – بشیر بدر
امیج – بشیر بدر
دست صبا – فیض احمد فیض
نسخہ ہائے وفا – فیض احمد فیض
بے آواز گلی کوچوں میں – احمد فراز
کلیات حبیب جالب – حبیب جالب
گمان – جون ایلیا
مدینہ نعت – صفدر ہمدانی
یا محمد محمد ( صلی اللہ علیہ وسلم ) میں کہتا رہا – انتخاب ، خالدہ سرفراز
انکار – پروین شاکر
خود کلامی – پروین شاکر
عکس خوشبو ( پروین شاکر کی شاعری سے انتخاب ) ۔ بشری ناصر
خیال چہرہ – افتخار راغب
لفظوں کا احساس – افتخار راغب
چپکے سے اتر مجھ میں – مرتضی اشعر
میری آنکھوں سے دیکھوں – فیصل عظیم
مر کر بھی تمہارے ہیں – ریحانہ قمر
محبت ہار جاتی ہے – سورج ہاشمی
موسم گل حیران کھڑا ہے ۔ کلیم احسان
نشاط خواب – ناصر کاظمی
پہلی بارش – ناصر کاظمی
سُر کی چھایا – ناصر کاظمی
غیر مطبوعہ کلام – ناصر کاظمی
پہلی بات ہی آخری تھی – منیر نیازی
ساعت سیار – منیر نیازی
تیز ہوا اور تنہا پھول – منیر نیازی
پچھلی رُت کا ساتھ تمہارا – عتیق الرحمن صفی
رنگ گلنار – سرور عالم راز سرور
رشک قمر – استاد قمر جلالوی
روشنی اے روشنی – شکیب جلالی
شوخ بیانی – شوکت جمال ( مزاحیاں شاعری )
چکن فالودہ – مرتبہ – گل فراز احمد ( مزاحیاں شاعری )
شور بادباں – اکبر حمیدی
ویران سرائے کا دیا – عبید اللہ علیم

طنز و مزاح :-

گدھے کی سر گزشت ۔ کرشن چند
مذاق ہی مذاق میں – فیاض حیدر

ناول :-

پیر کامل ( صلی اللہ علیہ وسلم ) عمیرہ احمد
لاحاصل – عمیرہ احمد
سحر اک استعارہ ہے – عمیرہ احمد
وآپسی – عمیرہ احمد
سولہواں سال – ایم اے راحت
کالکا دیوی – ایم اے راحت
کان کُن – علیم الحق حقی
عشق کا عین – علیم الحق حقی
عشق کا قاف – سرفراز احمد راہی
پُکار- سرفراز احمد راہی
مہا ماری – شموئل احمد
ندی – شموئل احمد
سوچ نگر کا مسافر – ڈاکٹر صابر علی ہاشمی
سلطان اور خان – اسلم راہی
تیر نگاہ – ایم اسلم
وہ خبطی سی ، دیوانی سی ( چار حصے ) – آسیہ سلیم قریشی
وہ جو حرف حرف چراغ تھا – نگہت بانو
ظلمت کدہ – ایم اے عظیم
وہ اک ایسا شجر ہو – فرحت اشتیاق
دل دریا سمندروں ڈونگھے ( دو حصے ) – آسیہ مرزا
تیری طلب کے سیپ اُٹھائے – آسیہ مرزا
در امید کے درویزہ گر – آسیہ مرزا
ماہی ماہی کوکدی ( دو حصے ) ہما کوکب بخاری
میں عبد القادر ہوں – ثروت نزیر
سمے کی راہ گزر – نگہت عبداللہ
تم کون پیا ؟ – ماہا ملک
آئیڈیل – رضیہ بٹ
جو میرا نصیب تھا – سعدیہ رئیس
کی جاناں مین کون ؟ فائزہ افتخار
اُسے ٹوٹ کر چاہا ہے ہم نے – سیدہ تہمینہ زہرا

افسانے :-

ابابیلیں لوٹ آئینگی – ترنم ریاض
ایک محبت سو افسانے – اشفاق احمد
ایٹمی جنگ – حیدر قریشی
مرگ زار – محمد حمید شاہد
لینڈ اسکیپ کے گھوڑے – مشرف عالم ذوقی
نئی صدی کا عزاب – ایم مبین
تیسرا ہاتھ – سرور عالم راز سرور
اردو کے مشہور افسانے – حسن علی ، قادر بخش
شرمیلی – بشری رحمن
چاند سی دُلھن – ماہا ملک
قاتل – رفعت مرتضی

مضامین :-

آگاہی گر نہیں – حاذق کلیم
آرژنگ – سید احمد شمیم
طواف دشت جنوں – حقانی القاسمی
انشائیہ اور انفرادی سوچ – پروفیسر جمیل آذر

انشائیے :-

پہاڑ مجھے بلاتا ہے – اکبر حمیدی
تلاش – ممتاز مفتی ( دو حصے )
المودودی – نعیم صدیقی

لسانیات :-

تُزک اردو – محمد اسمعیل
اردو محاورات کا تہزیبی مطالعہ – ڈاکٹر عشرت جہاں ہاشمی

دینیات :-

سیف ِ چشتیائی – پیر مہر علی شاہ رحمۃ اللہ
خلافت اور ملوکیت – سید ابو الاعلی مودودی
پردہ – سید ابو الاعلی مودودی
آداب زندگی – مولانا محمد یوسف اصلاحی
الخفلیفۃ المہدی فی الاحادیثِ صحیحہ – ( مؤلف ) سید حسین مدنی ( ترجمہ ) مولانا حبیب الرحمن
راہِ عمل – مجموعہ منتخب احادیث حصہ اول ( مُرتبہ ) مولان جلیل احسن ندوی
زادِ راہ – مجموعہ منتخب احادیث حصہ دوئم ( مُرتبہ ) مولان جلیل احسن ندوی
جہاد اسلامی – ( مُرتبہ ) خلیل احمد حامدی
جادہ و منزل – سید قطب شہید ( ترجمہ ) خلیل احمد حامدی
جدید جاہلیت – محمد قطب ( ترجمہ ) ساجد الرحمن صدیقی
علامات قیامت اور نزول مسیح – مفتی اعظم پاکستان مولانا مفتی محمد رفیع عثمانی
الامام المہدی – مولانا سید محمد بدر عالم
رسولِ کامل (صلی اللہ علیہ وسلم ) – ڈاکٹر اسرار احمد
شہید مظلوم ( حضرت عثمان ذوالنورین رضی اللہ تعالی ) – ڈاکٹر اسرار احمد
مثیل عیسی ، علی مرتضی – ڈاکٹر اسرار احمد
قرآن حکیم کی قوتِ تسخیر – ڈاکٹر اسرار احمد
اسلام کی نشاطِ ثانیہ – ڈاکٹر اسرار احمد
عقیدہ و منہج – حافذ محمد سعید
دُعائے حزب البحر – شاہ ولی اللہ
شرعۃ المتین ( مجموعہ احادیث ) – اسد الرحمن قدسی
حقائق اور افسانے – حسین امیر فرہاد
جھوٹے نبی – ابو القاسم رفیق دلاوری
خاتم النبین – مولانا محمد انور شاہ کشمیری
مجہور قرآن – محمد راغب الحسن
مسائل غسل – مولانا عبدالرؤف سکھروی
بائیس جھوٹے نبی – نثار احمد خان فتحی
مسئلہ رفع نزول مسیح علیہ السلام – مولانا عبدالطیف مسعود
عقیدہ نزول مسیح علیہ السلام – علامہ محمد یوسف بنوری
عورت کا بلا محرم سفرِ حج – پیرزادہ مفتی شمس الدین نور
راہ عافیت ( دو حصے ) – جمع و ترتیب ، ارکان نظام ایجوکیشن سوسائٹی
حضرت علی رضی اللہ تعالی عنہ کے سو قصے – مولف ، شیخ محمد صدیق منشاوی
حضرت عثمان غنی رضی اللہ تعالی عنہ کے سو قصے – مولف ، مولانا خرم یوسف
حضرت حزیفہ بن یمان رضی اللہ تعالی عنہ – مولانا عمران اشرف عثمانی
توہینِ رسالت ( صلی اللہ علیہ وسلم ) – محمد اسلم لودھی
اسلام اور دہشت گردی – سید نسیر شاہ

تاریخ :-

خدا کی تاریخ – کیرن آرم اسٹرانگ ( ترجمہ ) یاسر جواد
بہتے لہو کی کہانی – ببرک لودھی
اینڈ آف ٹائم – ڈاکٹر شاہد مسعود
میں نے ڈھاکہ ڈوبتے دیکھا – صدیق سالک
اُجالے ماضی کے – ڈاکٹر ابو طالب انصاری

ڈرامے :-

ہجرت کے تماشے – جاوید دانش
مشن امن ( بچوں کے ڈرامے ) صائمہ الہی
ابھی تو رات ہے – انیس جاوید
سب ٹھیک ہے – اقبال نیازی

بچوں کا ادب :-

حکایات – مرتضی اشعر
جب ہم برے ہو جائینگے ( شاعری ) فراغ روہوی
کہانیاں جانوروں کی – آفتاب حسنین

تحقیق :-

صلاۃ الرسول ( صلی اللہ علیہ وسلم ) – مولانا حکیم محمد سیالکوٹی
معرفت ِ اسم محمد ( صلی اللہ علیہ وسلم ) – ترتیب و تحقیق ، محمد متین خالد
شہیدانِ ناموس رسالت ( صلی اللہ علیہ وسلم ) – ترتیب و تحقیق ، محمد متین خالد
علامہ اقبال اور فتنہِ قادیانیت – ترتیب و تحقیق ، محمد متین خالد
منظر شہاب ، حیت اور فکروفن – ڈاکٹر صلاح الدین رام نگری
شخصیتِ مسیح ( علیہ السلام ) بائبل کے ائینے میں – ترتیب و تحقیق ، محمد نواز فیصل آبادی
شیر شاہ سوری – ترتیب و تحقیق ، ڈاکٹر عطیہ الرحمن
آمنہ نے گھریلو ٹوٹکے – ترتیب و تحقیق ، آمنہ ملک
کذبات مرزا – حکیم محمود احمد ظفر

متفرق :-

ہاں میں باغی ہوں – جاوید ہاشمی
مارکسزم – تاریخ جس کو رد کر چکی ہے ۔ مولانا وحید الدین
سوشلزم – ایک غیر اسلامی نظریہ ۔ مولانا وحید الدین
احمقوں کی جنت – جی آر اعوان
بے حیائی ( آغاز سے انجام تک ) – نعیم احمد ابرار
حج کا طریقہ – مفتی عبد الرؤف سکھروی
قربانی اور ذولاحجۃ کے فضائل و مسائل – مفتی عبد الرؤف سکھروی
قربانی کے مسائل کا انسائیکلو پیڈیا – محمد انعام الحق قاسمی
کشکولِ قلندری – اسد الرحمن قدسی
پیارے نبی کی پیاری سنتیں – مولانا شاہ حکیم محمد اختر
شہر سدوم – شفیق مرزا
سود ، اللہ اوررسول سے اعلان جنگ – مفتی اعظم پاکستان مولانا مفتی محمد رفیع عثمانی

سفر نامے :-

ہر طرف روشنی ( سفر نامہ حج – دو حصے ) خورشید ناظر

جرم و سزا :-

ڈراپ سین – امجد بیگ ایڈوکیٹ
کالا برقعہ – احمد یار خان
قاضی کی کوٹھری اور کنواری بیٹی – احمد یار خان

جاسوسی ادب :-

سیکرٹ ایجنٹ – ڈاکٹر صابر علی ہاشمی
میں ایک جاسوس تھا ( دو حصے ) – طارق اسماعیل ساگر
خونی کہاوت – ایم اے راحت

عمران سیریز :-

بھیانک آدمی – ابن صفی
قبر اور خنجر – ابن صفی
درندوں کی بستی – ابن صفی
گمشدہ شہزادی – ابن صفی
شفق کے پُجاری – ابن صفی
قاصد کی تلاش – ابن صفی
رائی کا پربت – ابن صفی
پاگل کتے – ابن صفی
پیاست سمندر – ابن صفی
کالی تصویر – ابن صفی
خطرناک لاشیں – ابن صفی
گیند کی تباہ کاریاں – ابن صفی
چار لکیریں – ابن صفی
چالیس ایک باون – ابن صفی
آتشدان کا بت – ابن صفی
جڑوں کی تلاش – ابن صفی
عمران کا اغوا – ابن صفی
جزیروں کی روح – ابن صفی
چیختی روحیں – ابن صفی
خطرناک جواری – ابن صفی
ہیروں کا فریب – ابن صفی
دلچسپ حادثہ – ابن صفی
پتھر کا آدمی – ابن صفی
رات کا شہزادہ – ابن صفی

آصف احمد بھٹی

رخصت لے کر وزیر نے دارالخلافہ چھوڑا اور دور دراز کے ایک گاؤں میں ایک درویش کے بہروپ میں ڈیرہ ڈال دیا۔ گاؤں میں اس نے صرف دو لوگوں سے مراسم پیدا کئے۔ ایک موچی، دوسرے مسجد کا پیش نماز۔ یہ ان دونوں سے روزانہ ملاقات کرتا اور دونوں کی خدمت میں دو دو درہم پیش کردیتا، جنہیں یہ دونوں حضرات ایک اللہ والے کی طرف سے ہدیہ سمجھ کر قبول کر لیتے۔ کافی دنوں تک یہ سلسلہ جاری رہا۔ بالآخر ایک دن موچی نے درویش بابا سے کہا کہ اتنے عرصے سے آپ روزانہ مجھے ہدیہ دے رہے ہیں، کچھ مجھے بھی خدمت کا موقع دیں۔ گرچہ میں سوائے جوتے بنانے کے اور کچھ نہیں جانتا مگر آپ نے مجھ سے خدمت لی تو میرے لئے باعث ِ اعزاز ہو گا۔ درویش نے اسکی پیشکش کو قبول کرتے ہوئے اس سے ایک جوتا بنانے کی درخواست کی۔ مگر ساتھ ہی شرط یہ رکھی کہ جیسے میں کہوں ویسا ہی کرتے جاؤ اور یہ کام انتہائی رازداری کے ساتھ انجام دینا۔ موچی بخوشی یہ ذمہ داری قبول کرنے پر راضی ہو گیا۔

اولا” درویش نے اسے یہ حکم دیا کہ ایک جوتا تیار کرو جو اعلٰی ترین معیار کے چمڑے کا ہو، مگر اسکی لمبان کم ازکم ایک گز ہو۔ موچی اس عجیب و غریب قسم کے فرمان پر حیرت زدہ تو ہوا مگر چونکہ وہ درویش کے حکم کی پابندی کا وعدہ کرچکا تھا سو کچھ نہ بولا اور رات کے اندھیرے میں کمال ِ رازداری کے ساتھ اس نے اس حکم کی بجاآوری کا سامان شروع کردیا۔ دن بھر وہ اپنے معاش میں مصروف رہتا اور رات بھر ایک اللہ والے کی خاطر اس خاص قسم کی چلہ کشی میں مگن۔ چند روز کی شبانہ روز محنت کے بعد ایک عظیم الجثہ اور کائنات میں اپنی نوعیت کا انوکھا پاپوش تیار ہو گیا۔ موچی درویش بابا کی خدمت میں حاضر ہوا اور اپنے کام کی تکمیل کے بارے میں بتایا۔ بابا، جو دراصل ایک وزیر اعظم تھا، نے اپنے کمربند میں سے ہیرے جواہرات کی ایک پوٹلی نکالی اور موچی کو دیتے ہوئے اپنے حکم نامے کا اگلا مرحلہ جاری کیا۔ اور وہ یہ تھا کہ ان تمام جواہرات کو انتہائی نفاست اور ترتیب سے جوتے میں جڑ دو۔ ساتھ ہی اپنی جیب سے عطر کی ایک بوتل بھی نکال کر موچی کو دی اور کہا کہ جب جوتا مکمل ہو جائے تو یہ تمام کا تمام عطر اس پر انڈیل دینا۔

موچی کی پریشانی اپنے عروج پر تھی کہ یہ کیسا ملنگ ہے جو عجیب و غریب قسم کا کام کروا رہا ہے۔ مگر اسے تو اپنے دام سے کام تھا، سو خاموشی سے اپنے کام میں لگا رہا۔ چند راتوں کی مزید محنت کے بعد درویش کی سوچ اور معیار کے مطابق جوتا تیار ہو گیا۔ چنانچہ اس رات نماز ِ عشاء کے بعد درویش بجائے مولوی صاحب کی خدمت میں درہم پیش کرنے کے، موچی کے ساتھ اسکے گھر اپنی مصنوع دیکھنے چلا گیا۔ ادھر پیش نماز کو دھڑکا لگا کہ شاید بابا ناراض ہوگئے کہ نہ درہم دئے اور خود بھی غائب ہو گئے۔ پوری رات انہوں نے آنکھوں میں گزاردی، جبکہ آدھی رات کو درویش، موچی کی مدد سے اس دیو ہیکل جوتے کو اپنی کٹیا میں لے آیا اور موچی کو اس کارنامے پر اچھا خاصا انعام و اکرام دے کر رخصت کیا۔

وہاں نماز ِ فجر میں پیش نماز نے درویش بابا کو پکڑ لیا کہ آپ عشاء کے بعد بغیر ملاقات کئے غائب ہوگئے۔ میں پوری رات تشویش کے عالم میں جاگتا رہا ہوں۔ بتایئے سب خیریت تو ہے؟ درویش نے بھی مکمل پریشانی کا اظہار کرتے ہوئے ٹال مٹول سے کام لیا۔ مگر انکے بے حد اصرار پر بابا نے رازداری کا وعدے لیتے ہوئے اپنی پریشانی کا ذکر مولانا صاحب کے گوش گزار کیا۔

درویش نے بتانا شروع کیا کہ کل رات جب میں گھر لوٹا تو ایک عجیب واقعہ ہوا۔ برسوں سے میں خدا کی عبادت میں مشغول رہا ہوں اور ہمیشہ اس سے اپنے گھر کو رونق بخشنے کی التجا کی ہے۔ کل رات خدا نے میری سن لی اور میرا مہمان بن گیا۔ تمام رات میرا محبوب میری نظروں کے سامنے رہا اور میں جی بھر کے اسکا دیدار کرتا رہا۔ عجیب رات تھی کی محب اور محبوب کے درمیان کوئی حجاب نہ رہا اور میں اپنے رب سے باتیں کرتا رہا۔ جب صبح کا وقت قریب آیا تو خدا نے مجھ سے اجازت چاہی اور کہا کہ اب آسمان پر واپس جانے کا وقت آگیا ہے۔ میں نے اسے روکنے کی ہزار کوشش کی مگر وہ نہ مانا۔ میں اسکے پاؤں پڑ گیا مگر اس نے میری ایک نہ سنی اور جانب ِ آسمان پرواز شروع کردی۔ میں خدا کو تو نہ روک پایا، مگر اسکا ایک جوتا اسکے پیر سے اتر کر میرے ہاتھوں میں رہ گیا۔ گو خدا تو نہ رکا مگر خوشی اس بات کی ہے کہ میرے رب کا پاپوش اس وقت میرے پاس ہے۔

مولانا صاحب ہمہ تن گوش تھے اور درویش کی ایک ایک بات پر یقین کی سیڑھیاں طے کرتے جارہے تھے۔ حیرت کے عالم میں پھٹی ہوئی آنکھوں کے ساتھ گلے کو تر کرتے ہوئے انہوں نے پاپوش ِ مبارک کی زیارت کرنے کی خواہش کا اظہار کیا،جسے بابا نے یکسر مسترد کردیا۔ فرمایا کہ میں نہیں چاہتا کہ میرے محبوب کے جوتے کو کسی کی نظر لگے۔ مگر مولوی صاحب کی ضد کے آگے انہیں ہاتھ ڈالنا پڑے۔ بالآخر وہ مولوی صاحب کو اس وعدے کے ساتھ اپنی کٹیا تک لے آئے کہ اس واقعے کا ذکر کسی سے نہیں کریں گے۔

ڈرتے ڈرتے وہ درویش کے پیچھے پیچھے اسکی کٹیا میں داخل ہوئے، جو خدا کے جوتے کی خوشبو سے معطر تھی۔ پردہ ہٹا کر جو دیکھا تو خدا کے عین شایان ِ شان ایک خوبصورت اور عظیم جوتا نظر آیا۔ مولوی صاحب جوتے پر جاگرے اور وہ بوسہ گری شروع کی کہ جوتے کے اگر ہاتھ ہوتے تو وہ مولانا صاحب کے آگے جوڑ کر جان چھوڑنے کی درخواست کرتا۔ بہت مشکل کے بعد مولانا صاحب جوتے سے جدا ہوئے۔ درویش نے ایک بار پھر یاددہانی کروائی کہ کسی سے اسکا ذکر نہیں ہونا چاہیئے ورنہ خدشہ ہے کہ خدا ناراض ہو جائیگا۔ مولوی صاحب حواس باختگی کے عالم میں وہاں سے بھاگے اور سیدھا اپنے گھر جا کر دم لیا۔ سانس پھولا ہوا، پسینے میں شرابور مولوی صاحب کو دیکھ کر انکی زوجہ بھی پریشانی کا شکار ہو گئیں۔ پوچھا کہ کیا معاملہ ہے، مگر عہد بندی کی مجبوری کے تحت مولانا صاحب مہر بہ لب رہے۔ زوجہ نے بھی ناشتے کو اس راز کی افشائی سے مشروط کردیا۔ مولوی صاحب بھی اس وقت تک کچھ سنبھل چکے تھے، سوچا کہ اسے بتا دیتا ہوں، اس نے کسے بتانا ہے۔ چنانچہ ناشتے کے دسترخوان پر مولانا صاحب نے تمام قصہ اپنی زوجہ کے اس شرط پر گوش گزار کیا کہ کسی تیسرے کو اس بارے میں خبر نہیں ہونی چاہیئے۔ زوجہ نے بھی پیمان بندی کی اور کان لگا کر سب کچھ سنا۔ مگر اپنی زنانیت کے ہاتھوں مجبور بیچاری مولون اس راز کے بوجھ کو اٹھانے کی سکت سے محروم تھی۔

ظہر کے وقت مولانا صاحب نماز پڑھانے مسجد کی جانب چلے، جبکہ مولون صاحبہ روٹیاں لگوانے تندور کی جانب۔ روٹیاں لگوانے کے دوران اس سے رہا نہ گیا اور اس نے تندورچن کو خدا کے جوتے کا قصہ من وعن سنا کر ہی دم لیا اور ساتھ ہی کسی اور کو نہ بتانے کا وعدہ بھی لے لیا۔ تندورچن اپنا تندور سمیٹ کر جب اپنے گھر کو چلی تو سب سے پہلے اپنے خاوند سے جوتے کے قصے کے بارے میں دریافت کیا۔ اسکو لا علم پاکر تمام قصہ مع چند مصالحوں کے سنا ڈالا۔ تندورچی اپنے کوچے میں نکلا اور پڑوس کے دوستوں سے اس بارے میں پوچھا۔ کسی کو بھی اس بارے میں علم نہ تھا، سو وہ سب واقعے کی تصدیق کی نیت سے ایک گروہ کی شکل میں درویش کی کٹیا کی جانب چل کھڑے ہوئے اور بغیر اجازت اپنا مدعا حاصل کرنے کٹیا میں داخل ہو گئے۔ اندر جا کر جو دیکھا تو درویش کو جوتے کی چمک کاری میں مصروف پایا۔ تمام زائرین جوتے پر ٹوٹ پڑے اور اپنے نصیبوں کی یاوری پر نمائش ِ دنداں کرنے لگے۔ جسکی جیب میں جو کچھ تھا، وہ سب کا سب پاپوش ِ خدا کی نذر کردیا۔ اب جو یہ گروہ یہاں سے رخصت ہوا تو یہ محض چند لوگ نہ تھے، بلکہ ایک خبر رساں ادارہ بن چکا تھا۔ ایک گلی سے دوسری گلی، گلی سے محلہ، محلے سے دوسرے محلے اور ہوتے ہوتے بات پورے شہر میں جنگل کی آگ کی مانند پھیل گئی۔

اب کیا تھا، درویش کی کٹیا ایک زیارتگاہ بن چکی تھی، جہاں زائرین کا تانتا بندھا ہوا تھا۔ پورا شہر امڈ آیا تھا۔ جھونپڑی میں نذرانوں کے ڈھیر لگ چکے تھے اور اطراف میں نیاز کی دیگیں چڑھنا شروع ہو گئیں۔ اب جوتے کی حفاظت ایک سنگین مسئلہ بن گیا، جسکا حل یوں نکالا گیا کہ بستی کا شیشہ گر شیشے کی ایک خوبصورت سی الماری بنا کر لایا اور جوتے کو اس میں سجا کر زیارت کے لئے ایک اونچے مقام پر رکھ دیا گیا۔ دیگر شہروں اور دور دراز کے علاقوں سے زائرین آتے رہے اور کچھ ہی وقت میں درویش کو نذرانوں کی صورت میں اتنی رقم مل گئی کہ وہ ایسے سینکڑوں جوتے تیار کرنے کا کارخانہ لگوا سکتا تھا۔ چلتے چلتے بات بادشاہ کے دربار میں بھی پہنچی اور بادشاہ نے بھی اس تبرک کی زیارت کا قصد فرمایا۔ چنانچہ شاہی سواری بڑے طمطراق کے ساتھ چلی اور متعلقہ بستی میں پہنچی۔ بادشاہ حفظ ِ مراتب کے تحت اپنی سواری سے اترا اور پابرہنہ ہو کر باادب پاپوش کی جانب چلا۔ آنکھوں میں آنسو اور جیب میں جواہرات کا نذرانہ لے کر جب بادشاہ پاپوش کی بوسہ گری کو جھکا تو ساتھ ہی کھڑے درویش کے بہروپ میں اسکے وزیر نے کہا،

“حضور! یہی بھیڑچال ہے۔”

محترم قاریئین! یہ وہ قصہ ہے جو پندونصائح کی قدیم کتب میں ملتا ہے اور اسے استاد شہید آیت اللہ مرتضٰی مطہری اکثر اپنے دروس میں طلبا کی درست سمت میں تربیت کے واسطےسنایا کرتے تھے۔ جب میں نے یہ قصہ پڑھا تو محسوس کیا کہ ہم سب بھی تو ذاتی، اجتماعی، سیاسی، سماجی، مذہبی اور قومی الغرض ہر طرح بھیڑ چال ہی کا شکار ہیں۔ میرا آپ سے بھی یہی سوال ہے کہ کیا ہم اس مرض میں مبتلا تو نہیں؟

بدبخت امریکی پادری ٹیری جونز نے ایک ہفتہ پہلے اعلان کیا تھا کہ اگر ایران مرتد یوسف نادر خانی ( جسے ایرانی حکومت نے اس کے ارتاد کے سبب 2006 میں گرفتار کیا تھا اور جسے ایرانی کی شرعی عدالت نے سزائے موت سنائی تھی مگر جس پر ابھی تک عمل نہیں کیا گیا ) کو تمام مقدمات ختم کر کے آزاد نہیں کرے گی ، تو وہ احتجاجا اپنے چرچ میں قرآپ پاک کے نسخوں کو ایک بار پھر جلائے ( بے حرمتی کرے ) گا ، اور کل اس نے اپنے اعلان پر عمل کر دیا ، امریکی حکومت نے سوائے اس ایک بیان کے کہ ٹیری جونز کے اس عمل سے افغانستان میں امریکی فوجیوں کی زندگی لاحق خطرات مزید بڑھ جائینگے ، اور کچھ نہیں کیا ، بلکہ اخباری اطلاعات کے مطابق جس وقت بدبخت ٹیری جونز یہ قبیح حرکت کر رہا تھا اس وقت پولیس وہاں موجود تھی اور اسے تحفظ فراہم کر رہی تھی ۔
خیر امریکہ کی تو بات ہی چھوڑیں ، کیا کہیں اور سے بھی صدائے احتجاج بلند ہوئی ہے ؟
آصف احمد بھٹی

آج لياري ميں جرائم پيشہ افراد کے خلاف جاري آپريشن کے چوتھے روز پوليس کے تازہ دم دستے علاقے ميں پہنچ گئے ہيں جنہوں نے پوزيشنيں سنبھال لي ہيں. علاقے ميں چار روز سے بجلي اور پاني کي عدم فراہمي کے باعث لوگوں کي بڑي تعداد محفوظ مقامات کي جانب نقل مکاني کر رہي ہے ۔۔۔

کیا کسی نے سوچا لیاری کے نقل مکانی کرنے والے ہمارے اپنے ہی بہن بھائی ہیں ۔۔؟
کیا کسی نے سوچا کہ وہاں بسنے والے معصوم بچوں کی تعلیم کا کیا ہو گا ۔۔؟
وہاں کے رہنے والے کیا کھاتے ہونگے ، کہاں سے اور کیسے لاتے ہونگے ۔۔؟
وہ کیسے سوتے ہونگے ۔۔ ان کی نییندوں کی پریاں کہاں ہیں ۔۔۔؟
انہیں کیسے خواب آتے ہونگے ۔۔ ؟
اس وحشت اور ڈر میں اپنے خدا پر یقین کا کیا عالم ہو گا ۔۔؟
مرنے والوں کو کفن بھی نصیب ہوا تھا کہ نہیں ۔۔؟

لیاری ٹاؤن شہر کے جنوب مغربی حصے میں واقع ہے۔ یہ رقبے کے لحاظ سے کراچی کا سب سے چھوٹا قصبہ ہے تاہم کثافت آبادی یہاں سب سے زیادہ ہے۔ 1998ء کی مردم شماری کے مطابق یہاں کی آبادی تقریبا 6لاکھ 8 ہزار ہے۔

حکمران اپنے مفادات اور انا کی جنگ میں اپنے ہی لوگوں کو اپنے ہی وطن میں زلیل و رسوا کر رہے ہیں ۔۔ ہے کوئی جو اپنے ہی لوگوں کو ان درندوں سے بچا جائے ۔۔ ارے کچھ نہیں کر سکتے تو اس مکروہ کھیل کو برا ہی کہہ دو ۔۔ صدائے احتجاج تو بلند کرو ۔۔۔

دعا ۔۔۔ ماگتے ہیں تجھ سے اے سب سے جلد راضی ہونے والے رب

اے اللہ ۔۔ میرے مالک ۔۔ میرے رب کریم
یہ میں کیسے زمانے کی گواہ بن رہی ہوں
یہ کیسے دن رات ہیں
جن پر تیرا قہر ہر سو تاریکی کی طرح چھایا ہوا ہے
کیسا یہ اندھیر ہے
کہ
صاحب جبروت تو ہے اور ساری مخلوق تیرے زیرِ تصرف ہے
اور دنیا کے یہ دجال
ساری مخلوق کو اپنے تصرف میں رکھنے کے دعویدار ہے
اے رحم کرنے والے نہایت مہربان مالک
مالک و کارساز تو، سب کا سب سے بڑا محسن تو ہے
سارے جہانوں کی کبریائی بڑائی پر بس تیرا ہی حق ہے
اور دنیا کے یہ لوگ
ابو جہل اور ابو لہب کے سارے وصف اپنا رہے ہیں
اے سب پر غلبہ پانے والے سب سے زیادہ عزت والے رب
اے سب کو روزی دینے والے
سب کے لیے رحمت و رزق کے دروازے کھولنے والے رب
تنگی کرنے والا تو ہے اورسب سے بڑاصاحبِ قوت بھی تو ہے
اور یہ صاحب ثروت
تیرے ہی بندوں سے چھین کر غاصبوں کی طرح ذخیرہ کر رہے ہیں
اے سب کچھ جاننے والے بہت بخشنے والے خدا
بہت مضبوط ہے تو پست کرنے والا اور موت دینے والا بھی توہے
اور یہ دنیا پر حکمران
اپنے ہاتھوں سے اپنے ہی لوگوں کے گلے دن رات کاٹ رہے ہیں
اے سب کچھ سننے والے خدا
میرے حاکمِ حقیقی سراپا عدل و انصاف
سب پر پوری طرح غالب تو جس کے سامنے سب مغلوب اور عاجز ہیں
تو ہی ہے مجرمین کو کیفرِ کردار کو پہنچانے والا
سب پر کامل اقتدار رکھنے والا
اور تیرے یہ مجرم
دنیا میں یوں دندنا رہے ہیں جیسے انہیں کوئی فنا نہیں ہے
تو ہی ہے توبہ کی توفیق دینے والا اور توبہ قبول کرنے والا
زندگی بخشنے والا
اور دنیا کے یہ بےبس انسان
اپنی جھولی پھیلائے انسانوں سے رحم کی بھیک مانگ رہے ہیں
یہ کیا ہو رہا ہے ۔۔ سارے جہانوں کے مالک اور مہربان
امن و امان عطا کرنے والے۔۔صاحبٍ مستحقِ حمد و ستائش
نہایت بردبار سب کے نگہباں سب کو سامانِ حیات فراہم کرنے والے
مرے مالک ۔۔ میرے رب کریم ۔۔
یہ میں کیسے زمانے کی گواہ بن رہی ہوں
جہاں ہم یہ بھول بیٹھے ہیں
کہ
صرف تو ہی ہے ہمارا رب
بغیر مثالِ سابق کے مخلوق کا پیدا کرنے والا
سب کے فنا ہونے کے بعد باقی رہنے والا
یعنی ہمیشہ رہنے والا ۔۔۔جسے کبھی فنا نہیں ہے
صاحبِ رشد و حکمت ۔۔ جس کا ہر فعل درست ہے
میں یہ سوچ رہی ہوں کب سے ۔۔۔
اے نفع پہنچانے والے سراپہ نور ، سارے جہانوں کے مالک
تو بے شک صاحبِ جلال اور بہت کرم فرمانے والا ہے
تو بڑا صابر ہے بندوں کی بڑی سے بڑی نافرمانیاں دیکھتا ہے
اور
فوراً عذاب بھیج کر انہیں تہس نہس نہیں کرتا
پر ایک التجا ہے تجھ سے
اے میرے ہر بات سے با خبر بے نیاز رب
اے میرے نگہدار محافظ میرے حقیقی رب
عادل و منصف تو ہے اور حقدار کو حق عطا کرنے والا بھی تو ہے
اے امن و امان عطاکرنے والے صاحبٍ کرم
میری ارض پاک پر رہنے والوں کو ان کا حق عطا کر
اے سب کے لیے کفایت کرنے والے
ان کی کفایت کر
اے عظیم القدرسرپرست و مددگار
بس تو ان کا منصف بن جا اور ان کا انصاف کر
(آمین )
ڈاکٹر نگہت نسیم
سڈنی

اوہ میرے اللہ۔میرے مر جانے کے لیئے بس یہ شہ سرخی کافی تھی۔ پانچ پاکستانی نژاد مسلم نوجوان۔ دو نابالغ گوری بچیاں اور چھتیس گھنٹے تک ان درندوں کے بقول انکے” ان بچیوں کے ساتھ عید منائی”۔ اللہ کی لعنت ہو ایسی بدروحوں پر جو خود کو مسلمان بھی کہتے ہیں۔ان ملکوں میں آکر رہتے بھی ہیں اور انہی کی بچیوں کے ساتھ یہ قبیح حرکات کر کے مسلمانوں کو اور اپنے آبائی ملک کو بدنام کرواتے ہیں۔ سوچتا ہوں کہ ان درندوں کو بہت کم سزا دی گئی ہے انکو باقی ماندہ تمام عمر جیل میں رکھنا چاہیئے تھا اور کسی طرح انکے والدین کو بھی سزا ملنی چاہیئے تھی کہ ان بدقماشوں کی تربیت کی زمیداری کن کی تھی؟

یہ سطور پڑھ کر تو جیسے مجھے اپنے مسلمان اور پاکستانی ہونے سے نفرت ہونے لگی
محترم المقام جناب صفدر ہمدانی کاپورا کالم پڑھنے کے لئے یہاں کلک کیجئے

جوانی میں کتابیں پڑھنا ایسا ہی ہے جیسے آپ کسی درز سے چاند دیکھ رہے ہوں . ادھیڑ عمر میں کتابوں کا مطالعہ ایسے ہی ہے جیسے کھلے آنگن میں چاند کو دیکھا جائے اور بڑھاپے میں کتاب بینی ایسی ہے جیسے اونچی ہموار جگہ سے چاند کا نطارہ کیا جائے . اس کی وجہ یہ ہے کہ مطالعے سے جوفائدے حاصل ہوتے ہیں ان کی گہرائی اپنے ذاتی تجربے کی گہرائی کے تناسب سے بدلتی رہتی ہے .

جو شخص کتاب زندگی جیسے بے لفظ کتاب کا مطالعہ کرنے کاہنر رکھتا ہے وہی شخص حسین اور لاجواب باتیں کر سکتا ہے . وہ سچائی جو لفظوں میں سما نہیں سکتی اگر کسی کی سمجھ میں آجائے تو اسےحکمت اعلی کا ادراک ہو جاتا ہے .

ادب وہ منطر ہے جو میز پر رکھا ہے اور منطر وہ ادب ہے جو زمین پر بکھرا ہوا ہے . مطالعہ سب سے بڑی مسرت ہے . پھر بھی تاریخ کا مطالعہ کرنے سے خوشی نہیں ہوتی بلکہ نا انصافیوں پر غصہ آتا ہے . لیکن اس غصے میں بھی کتنا مزہ ہے .

کہتے ہیں کہ ادبیات عالیہ کی کتابیں سردیوں میں پڑھنی چاہیئے کیونکہ ان دنوں ذہن اور توجہ ان دونوں پر مرکوز رہ سکتی ہے .تاریخ کامطالعہ گرمیوں میں کرنا چاہیئے کیونکہ ان دنوں آدمی کے پاس کافی وقت ہوتا ہے . پرانے فلسفیوں کا مطالعہ خزاں میں کرنا چاہیئے کیونکہ ان کے خیالات بڑےدلکش ہوتے ہیں .اور دور حاضر کے ادیبوں کی کتابیں بہار میں پڑھنی چاہیئے کہ ان کو پڑھنے سے فطرت میں جان پڑ جاتی ہے .

جب کوئی فوجی جرنیل ادب پر بات کرے تو افواہ سی لگتی ہے اور جب کوئی ادیب اپنے کمرے میں بیٹھ کر جنگی بحث کرتا ہے تولگتا ہے جیسے کاغذ کے سپاہی بنا رکھے ہوں . پر بات تو بات ہے کرنے کو سب ہی کرتے ہیں .

یقین جانئے جومطالعہ کرنا جانتا ہے وہ جہاں جاتاہے اس کے لئے ہر چیز کتاب بن جاتی ہے .پہاڑ اور دریا بھی کتابیں ہیں .چاند اور پھول بھی کتابیں ہیں.جنگ و دہشت گردی بھی ایک کتاب ہے .. پیار اور نفرت بھی ایک کتاب ہے .تاریخ کا ایک منظر بھی ایک کتاب ہے اور ایک شعر بھی ایک کتاب ہے .

آج کل آپ کے زیر مطالعہ کونسی کتاب ہے … اگر نہیں ہے تو ملکی موسم کے حساب سے کتاب کا انتخاب کر لیجئے … اور ہم سب کو اس کتاب کے بارے میں بتانا مت بھولئےگا .