پچیس فروری دوھزار نو میں پاکستان کی سپریم کورٹ نے پنجاب کی واحد مستحکم حکومت کو اپنے یکطرفہ ذاتی فیصلوں کی بھینٹ چڑھا کر نہ صرف صدارتی فرمان جاری کیا بلکہ سانس لیتے ھو ئے انسانوں کو سانس روک لینے پر مجبور کر دیا ۔۔ اہل پنجاب کے ساتھ ساتھ اندورن ملک اور بیرون ملک سب نے حیرانی کے ساتھ سنا کہ “ آج سپریم کورٹ نے شریف براداران کو نااہل قرار دے دیا اور پنجاب میں گورنر راج نافذ کر دیا ۔۔ یوں مجھ جیسے سوختہ جاں کو جیتے جاگتے  انسانوں کے شہر کو “شورش زدہ“ لکھنے پر مجبور کر دیا ۔۔۔۔

جنازہ عدل کا نکلا ہے اک بیمار کے ہاتھوں
عدالت بِک گئی اک بار پھر زردار کے ہاتھوں
۔۔۔۔۔۔
ابھی پھر وار اُس نے کر دیا دن کے اُجالے میں
ابھی اک زخم کھایا تھا اسی تلوار کے ہاتھوں
۔۔۔۔۔۔
بھروسہ تھا سہارے کا ہمیں دیوار پہ لیکن
ہماری چھت گری گھرکی اسی دیوار کے ہاتھوں
۔۔۔۔۔۔
نہ جانے نام کیا رکھیں دلاسہ دینے والے کا
غموں پہ غم ملے صاحب ہمیں غمخوار کے ہاتھوں
۔۔۔۔۔۔
کسی صورت خبر چھپنے سے رکوائیں عدالت کی
حکومت خوف میں ہے شہر کے اخبار کے ہاتھوں
۔۔۔۔۔۔
بنی ہے شہر کی خلقت نشانہ تیرِ ظالم کا
سیاست طوقِ ذلت بن گئی اس وار کے ہاتھوں
۔۔۔۔۔
کوئی اپنا مخالف مملکت میں رہ نہیں سکتا
ہوئے ہیں شہر ویراں اِک اسی آزار کے ہاتھوں
۔۔۔۔۔
ھدف اک بار پھر اسکا بنوں گا ہے خبر مجھکو
میں پہلے بھی بہت مطعون تھا اظہار کے ہاتھوں
۔۔۔۔۔
یہی کردار تو انسان کو انساں بناتا ہے
بشر ہوتا بھی ہے رسوا اسی کردار کے ہاتھوں
۔۔۔۔۔۔
سنبھالو سر پہ جو دستار ہے کارِ فضلیت کی
کٹے ہیں سر بہت سُن لو اسی دستار کے ہاتھوں
۔۔۔۔۔
اسی اک خوف نے صفدر مری آنکھیں جلا ڈالیں
مرَض پھر جائے گا یہ فوج کے سالار کے ہاتھوں

صفدر ھمدانی ۔لندن